Riba e di dos dia di Pasco, esta 26 di december, a saca Natasha Janga, kende tabata biba na Seroe Blanco 163-C, for di e cas cu tur su pertenecia y sin cuminda. Pero segun Francis Wever e ta sinti cu mester aclaria algun cos cu no ta corecto.
Wever a splica cu Janga tabata compaña cu su yiu homber, di cual nan a ofrece un dak pa biba. Esaki ta debi cu unda nan tabata biba, a pone nan porta afo. E pareha aki no ta paga niun florin pa drumi na e cas y cu tur cos ta gratis, coriente y awa. E hospedahe ta gratis y nan por haci uzo di tur facilidad den e cas, esta frishider, stof. El a ripara cu Janga a bisa cu su placa a bay den mantene su dos yiunan, pero e no ta di acuerdo pasobra e yiunan ta keda cerca e tata, kende ta cuida bon di su yiunan. No ta costa Natasha Janga niun placa pa mantene su yiunan y e no ta traha, no ta haya bijstand y no tin niun entrada.
A ripara cu e ta un persona hopi dificil pa anda cu ne, pasobra hopi biaha tin beis. Wever a sigui indica cu cada bes Janga y su yiu ta den pleito, tabatin momento cu a kibra cosnan den cas, polis a presenta na e dicho adres aki na diferente biaha. E ta considera loke Natasha Janga haci ta un comedia, pasobra su persona a bisa cu e tin di bandona e cas. Esaki ta debi cu e yiu a termina su relacion cu Natasha Janga, aunke e yiu a bisa esey na diferente ocasion.
Riba e di dos dia di Pasco awa a pasa hariña y mester a pone fin na e situacion. A pidie pa bay di e cas of nan ta busca polis p’e. Pa loke ta trata su pertenencianan, Janga mes a saca nan y pone pafo. Segun Wever, Janga mes a laga prensa presenta na e sitio y haci cu nan ta esun cu a sac’e di e cas. E ta haya loke el a haci di duna e entrevista aki no ta pa destrui un persona pero ta pa trece e berdad.
