For di promé ku 2010 gobièrnunan di turno, ku a bin ta goberná Kòrsou, a bin ta haña nan ku e fenómeno di Red Tape.
Kaminda mundu komersial i komunidat a bin ta kritiká ku ta dura años pa otorgá respektivamente pèrmitnan pa aktividatnan komersial, esta ku e proseso ta dura demasiado largu. Aña aden aña afó gobièrnu a bin ta splika ku lo eliminá e problema aki pero te ku awe, ku nos ta den aña 2018 ainda e problema menshoná ta manifestá su mes ketu bai i nos no ta mirando un kambio. Den e kuadro aki, mirando e situashon ekonómiko di atenshon ku ta reinando aktualmente na Kòrsou, pa frakshon di MAN ta importante pa hiba un diskushon ku gobièrnu pa sa kiko ta keda konsiderá komo Red Tape i tambe kiko ta e posibel solushon ku konhuntamente nos por yega na dje.
Debí na hopi konfushon ku tin rondó di e asuntu di Red Tape frakshon di MAN a manda un karta na presidente di Parlamento pa konvoká un reunion di komishon sentral enkuantu di Red Tape. Pa ku e reunion aki frakshon di MAN ke pa Minister di Asuntunan General i Minister di Desaroyo Ekonómiko, Minister di Salubridat Públiko, Medio Ambiente i Naturalesa i Minister di Tráfiko, Transporte i Planifikashon Urbano ta presente na e reunion.
