Recientemente por a tuma nota di un decision di CAft cu a causa hopi conmocion aki na Aruba. Ta trata aki di e paramento di fiansa pa Aruba debi cu no a cumpli cu e cortamento exigi pa Hulanda di 60 miyon pa e aña aki pa loke ta trata cuido medico. Misha Raymond, ken ta e actual lider di fraccion di RAIZ a splica cu na final a pospone esaki y awo mester warda e parti di negociacion pa mira kico ta bay pasa.
No obstante, Raymond a enfatisa cu un cos so e sa: “Nos no por corta mas den cuido, nos no por, nos hendenan ta sufriendo, nos ta den pleno pandemia, casonan ta subi casonan ta baha y mi no ta kere mi tin cu bolbe menciona con esaki ta afecta e salud mental di nos hendenan”. Pues asina el a enfatisa cu no ta un opcion pa sigui corta unda no por corta mas pero cu si mester bin un decision lihe riba esaki ya cu pueblo no por tuma mas riba nan tayo pa loke ta trata e sufrimento cu tin andando.
Un otro cuestion cu a causa poco controversia sigur tabata esun di e biahe di e tres ministernan recien. Riba esaki, Raymond a splica cu di locual nan tin entendi, na momento cu ministernan bay afo mester notifica fraccion tocante esaki, pero esey no tabata e caso. Raymond a bisa cu e lo a prefera cu esaki si tabata asina pa nan por tabata bon prepara.
Pa cobertura mas amplio lesa edicion di TREMPAN mañan.
