Temporada di vakantie ta den porta! E cambio di rutina di bay scol y cuido despues di merdia pa hiba bo yiunan p’aki p’aya durante e proximo simannan por causa hopi stress. Maske tur mucha tin derecho riba diberticion sano y cu durante vakantie nan por siña hopi actividad nobo y diferente, toch tin hopi aspecto cu e mayornan mester tene cuenta cu ne. Pa haci un bon escogencia, mester naturalmente balansa e necesidad- y posibilidadnan di e mayor cu e necesidad- y deseonan di e mucha. Cual no ta facil.
Kico ta e opcionnan?
Tin mucha lo participa den programanan vacacional cu ta encera diferente actividad den dia of tin algun cu muchanan ta keda drumi anochi tambe. Otro mucha ta keda cerca famia of conoci. Tin mucha ta keda cas cu babysitter, of cu ruman mas grandi. Tin mucha lo bay un vakantie kamp na un centro di cuido y guia di mucha. Of hasta tin mayor ta coopera cu otro mayor cu tambe ta traha y segun turno ta tuma dia liber y asina ta entretene e muchanan.
Cada un di e opcionnan aki ta varia den prijs y posibilidad pa bo yiu por enrikese su conocemento y experencia.
Cua sea e opcion cu bo scoge ta consehabel pa tene cuenta cu algun cos:
- Tene cuenta cu e necesidad di bo cartera. Pensa riba e cuido cu bo yiu mester. Si e mester di esaki pa henter of mitar dia, pa henter vakantie of djis pa cubri algun dia cu bo ta traha.
- Tene cuenta cu e necesidad di bo yiu. Puntra bo yiu kico e lo kier haci durante su vakantie y splic’e tocante bo budget. Puntre pa diferente opcion y lag’e sa kico por y kico no por.
- Tene cuenta cu e interes di bo yiu ta cambia segun e crece. Kisas e actvidadnan of kamp cu bo yiu a participa aden aña pasa no ta adecua p’e mas.
- Stipula un meta pa bo yiu. Ta bon pa involucra bo yiu ora di scoge un actividad pa evita cu bo yiu ta cuminsa cu algo y despues kier stop na caminda y bo ta perde bo placa.
- No forsa bo yiu di haci algo cu e no kier haci. Esaki no kiermen cu bo no por dun’e un push pa haci of purba algo nobo. Hopi biaha bo yiu por gusta un actividad despues cu e purb’e cu bo sosten y apoyo.
- Busca informacion y inscribi bo yiu na tempo. Unabes bo tin algun opcion cu ta alcansabel pa bo cartera y adecua pa bo yiu, busca informacion y tuma contacto cu e persona concerni pa asina e por contesta tur bo preguntanan. (fecha, cuminda, actividad, prijs, transport, etc).
Si acaso bo yiu no ta bay pasa su vakantie na un vakantie kamp of programa vacacional, ta importante pa traha un plan di vakantie hunto cu bo yiu(nan) pa wak con abo y bo yiu lo pasa e periodo di vakantie mas miho posibel. P’esey ta importante pa:
- Visualisa y schedule e vakantie door di traha un kalender riba un papel grandi y peg’e un caminda den cas. Yena e actividadnan cu bo por ofrece bo yiu. Asina e por anticipa y prepara. Si bo yiu ta di un edad mas grandi, e por yuda planea actvidadnan cu e kier haci y tambe actividadnan cu boso por haci hunto den bo tempo liber. (p.e: Bay lama, bay cana den parke Arikok, haci un limpiesa rond di cas, etc). Por lag’e scoge locual ta importante pe of kico e tin gana di haci. Esaki por ta un oportunidad pa e siña maneha su vakantie.
- Laga espacio habri pa bo yiu “haci nada.” Bo yiu mester di tempo pa descansa despues di a bay scol henter aña. No yena henter su vakantie cu actividad tras di actvidad. Por laga bo yiu scoge locual ta importante pa e haci of kico e tin gana di haci durante vakantie.
Vakantie job & Tarea pa haci na cas
Un vakantie job p’e muchanan mas grandi tambe ta un manara pa siña bo yiu traha pa un meta y spaar poco placa. Por ta den sector laboral of cosnan chikito na cas. Ora un mucha haci tarea na cas e ta sinti cu e ta forma parti di un team. Ora e completa su tarea mustr’e bo aprecio door di un treat of recompens’e cu algo cu e gusta (lama of ice cream). Esaki ta siña bo yiu cu tin recompensa ora e uza su tempo liber na un manera bon.
Drumimento durante vakantie
Vakantie ta un tempo dushi cu bo por bisa cu e muchanan tin menos structura door di e echo cu nan no tin cu lanta hopi trempan pa bay scol. Solamente si nan ta bai un vakantie kamp y esaki ta depende na e orario cu esaki ta cuminsa. Aunke vakantie ta pa releha esaki no ta nifica cu mester laga tur regla di cas bay. Ta importante pa percura pa bo yiu mantene su schedule normal di drumi. Mucha bou di 6 aña mester di 11 ora di soño tur dia y mucha di scol basico mester di 9.5 pa 10.5 ora di soño diario. Falta di soño por stroba e holoshi biologico di e mucha. Cu por causa problema di comportacion a lo largo.
Pa informacion of pregunta por acerca Fundacion Pa Nos Muchanan – Cumana 2
Tel: 5834247/5880856 – Whatsapp: 6998900
E-mail: [email protected] – Website: www.fpnm.aw
