Hopi mayor ta conoci cu diferente reto cu nan ta encontra durante nan trayecto di ta un mayor. Un di e retonan cu mayornan por encontra ta ora nan yiunan bay den e fase di adolescente. E yabi pa trata e fase aki ta pa para un rato, tuma un rosea profundo y relaha, y corda cu bo yiunan ta bayendo door di hopi cambionan fisicamente, emocionalmente y socialmente.
E siguiente tips nan por yuda abo como mayor crea y mantene un relacion sano cu bo yiunan durante nan period di adolescente.
Papia
Aunke cu mayoria adolescente gusta pasa mayoria di nan tempo den nan camber, nan toch kier sa cu abo como mayor tin interes den nan bida. E yabi pa papia cu un adolescente ta pa mantene un combersacion calmo y relaha. Un simpel pregunta “con a bay cu bo dia?” por stimula bo yiu pa cuminsa combersa. Puntra regularmente tocante su amistadnan, y no solamente ora e tin cu sali of bay haci projecto. Esaki tambe ta mustra bo yiu cu bo ta berdaderamente interesa den su bida personal. Algun otro topico di combersacionnan por ta metanan, logronan, retonan, interes di bo yiu (sport, hobby, pelicula, muziek). E meta tras di e combersacionnan ta cu nan ta keda uno positivo y agradabel. Ta importante cu e combersacionnan aki no ta bira un sesion di gritamento y zundramento, esaki por descurasha un adolescente pa sigui tene combersacionnan cu nan mayor. Como mayor purba di combersa sikiera 15 pa 30 minuut pa dia. Esaki por pasa unda cu ta, specialmente ora bo ta ripara cu bo yiu tin animo pa papia. Por ehempel, den auto, despues di scol, ora di come, etc.
- Scucha
Ora tin bon scuchamento di parti di e mayor, esaki ta duna e adolescente e oportunidad pa descarga locual cu ta riba nan mente. Ta bon pa responde cu comentarionan y preguntanan cu ta encurasha nan pa elabora. Scuchamento ta hopi crucial durante combersacionnan cu ta dificil of sensitivo. Mayornan mester purba di scucha nan adolescente cu un mente habri y duna un respuesta constructivo, si nan yiu aserca nan cu un problema. E por ta dificil pa un myor keda calmo ora nan yiu a haci algo robes, pero e ta importante pa mantene e liña di comunicacion habri. Un reaccion liher por causa cu un adolescente pa sera su mes y keda keto den futuro, enbes di aserca abo cu e situacion.
- Establece y aplica reglanan
Apesar cu e ta importante pa scucha y pa keda racional ora di discuti situacionnan preocupante cu adolescentenan, e ta mes un importante pa establece standardnan. Adolescentenan mester siña comportacion aceptabel, y nan mester sa kico ta e consequencianan ora nan kibra e reglanan. Mayornan mester purba di evita gritamento y bisa cosnan cu por laga nan sinti menos importante. Locual cu ta importante ta cu e aplica cualkier consequencia cu ta pas cu e situacion.
- Pasa tempo hunto
Pasando tempo di calidad hunto ta un bon manera pa crea un laso fuerte. Bida ta bira druk, y tin biaha ora e calender di bida bira un poco loco, adolescentenan por sinti nan mes lubida y isola. Tumando tempo for di bo agenda druk pa pasa tempo cu bo yiu ta pone nan sinti balora y aprecia. E no mester ta nada complica. E por ta algo simpel manera bay “hike”, busca ice cream, bay wak pelicula, etc.
- Ta un mayor
Tin biaha e ta facil pa crusa e liña entre mayor y amigo/a ora bo ta purbando di forma un laso cu bo yiu adolescente. E por ta dificil pa scucha cu un mente habri manera un amigo/a pero na e mes un momento keda enforsa reglanan y limetenan. Aunke cu e por causa argumentonan, adolescentenan mester di mayornan responsabel pa cuida nan y mantene nan safe. Mayornan cu ta concerni cu dunando consequencianan por kibra e laso cu tin entre mayor y yiu mester corda cu adolescente mayoria biaha ta respeta mayornan cu ta mantene nan mes na palabracionnan (aunke cu un adolescente nunka lo admiti esaki).
