Diahuebs atardi a tuma luga un accion di buskeda di e homber Farao Vrolijk, cu a sali for di su cas den careda di 10:45 am y te den ora di atardi no a yega su cas bek. Mirando cu ora ta pasa y e no a yega cas ainda, famia a bati alarma. Pa mas o menos 3:45 pm a drenta un melding na warda di polis, unda cu a informa cu e homber Farao Vrolijk no a yega cas ainda. Di biaha a cuminsa busca e homber.
Polis hunto cu famia a uni pa haya e homber. A cana den rooi pa mira si nan por topa cu ne. A saca helicopter cu a señala un persona masculino drumi den e rooi banda di Maria Maai/Jamanota.
Helicopter a baha pa check estado di e persona aki.
A yama brandweer hunto cu ambulance, tur a pone man hunto pa saca e persona aki for di unda e tabata den e mondi. E victima tabata deshidrata, mirando cu el cay y a keda varios ora den solo.
Vocero di polis, Liliana Rasmijn a elogia su coleganan di polis, cu a mobilisa mesora pa busca e meneer perdi den mondi.
E combinacion di buskeda na tera y den halto, tabatin como fruto cu den un rato di ora a localisa e homber, prome cu solo a baha. E sosten di brandweer y paramediconan di ambulance tabata escencial pa por a logra yuda e pober homber aki.
Ambulance a transporta Farao Vrolijk pa hospital. Segun polis, su condicion ta stabiel.
