E tabata e campañado principal di ex-politico Otmar Oduber y den e ultimo campaña a pasa pa Rocco Tjon, actual Minister di Husticia y Asuntonan Social. Aisha Esser ta deteni desde ayera, net un dia despues di e fin di siman largo di carnaval. Ministerio Publico a confirma cu e ta cera bou acusacion di soborno, o sea ‘omkoping’. A bisa mas acerca cu e detencion ta relaciona cu e investigacion Flamingo, den cual e sospechoso principal ta ex-minister Otmar Oduber. Na tur tin ocho sospecho contra e ex-minister di Gabinete Wever Croes.
Tabata riba un dialuna, exactamente dia 10 di augustus 2020, cu ta net un aña, 6 luna y 20 dia pasa, cu Landsrecherche a yega cas di Aisha Esser den Caya Frere Vicentius na Paradijswijk, pa un inval. E dia ey no a detene e sospechoso, pero si a drenta su cas, coba pa tur computer y documento, a coba den su auto y a bay na su oficina den Cocolishi.
Esser tabata campañado di Otmar Oduber y despues a bira su compañado durante e periodo di gobernacion. Su trabou tabata, entre otro, pa atende cu publico cu tabata yega Cocolishi pa pidi pa ayudo. E tabata yuda hende, check unda documentonan tabata keda pega y core tras di e departamentonan pa publico por haya servicio na tempo. Tambe e tabata atende cu patrocinadonan den campaña, bendiendo BBQ, rifa, etc. Ex-minister Oduber a percura pa duna Aisha Esser trabou na DOW, aunke e no a traha ey nunca.
Pero, despues cu Otmar Oduber a baha como minister, e relacion a cambia. Binmento di Minister Marisol Lopez-Tromp na fin di januari 2020, a causa cu e reglamento di papel pa hende y atende publico no a sigui mas. E tabata sinta abou den e edificio di Bestuurskantoor y como cu Minister Tromp no tabata uz’e pa nada mas, e tabata ricibi bishita pa ministernan di MEP. Mester menciona cu na augustus a haci inval y no a presenta mas na trabou, mientras cu MEP, POR y RED a baha Minister Tromp na october 2020.
No por separa e retiro di Minister Tromp for di e tipo di casonan asina. Ta un cantidad di iregularidad el a topa cu ne ora el a asumi su funcion como minister. Y segun nos informacion, e lo a haci keho pa tur e iregularidadnan aki, incluyendo contra Aisha Esser tambe. E kehonan aki tur a bay den e caso di Flamingo, den un esfuerso pa por yega cera e investigacion y presenta e sospechosonan dilanti hues.
Aisha: Mi no tin nada di sconde
Aisha Esser: “drenta numa,” mi a bisa e polisnan, segun Esser. “Mi no tin nada di sconde. Mi ta un trahado di Otmar y mi no ta bay gaña. Door cu mi ta traha directamente cu Otmar y pesey nan a bin investiga. Semper mi a haci trabou di politiek, pero nada di pidi placa aki aya. Nunca di mi bida mi a bay DIP. Ora Otmar a drenta, prome cos el a bisa nos ta no por bay DIP. SI mester di un documento, mester pasa via di Otmar. Ningun di e tres trahadonan no tabata mag di haci esaki,” el a conta.
El a bisa cu e ta lamenta loke ta pasando pasobra nan ta simpel trahado, nos ta haci nada malo. E ta bisa di a papia cu Otmar Oduber, kende a sigur’e di ta inocente. Tambe Esser a conta cu den e tres añanan a atende mas cu 5 mil persona.
Caso Flamingo
Dia 24 di juni 2020, Landsrecherche (DLR) a haci varios huiszoeking en cooperacion cu RST (Recherche Samenwerkingsteam) y Cuerpo Policial Aruba y bao guia di hues-comisario. E huiszoekingnan aki tabata den cuadro di un investigacion penal di Landsrecherche tocante posibel delitonan di corupcion y otro hechonan castigabel relaciona cu otorgamento di tereno di gobierno. E investigacion penal aki ta carga e nomber codico ‘Flamingo’.
Procurador General a duna Landsrecherche opdracht na september 2019 pa cuminsa e investigacion aki relaciona cu informacion cu Ministerio Publico a ricibi di Cuerpo Policial di Aruba. Den e investigacion tin informacion tambe cu a wordo suministra na Ministerio Publico pa varios persona y organisacion. E investigacion ‘Flamingo’ ta dirigi primordialmente riba iregularidadnan den otorgamento di terenonan comercial di erfpacht den e periodo di 2017 pa 2019.
Mas concretamente bisa: e investigacion ta dirigi su mes riba e pregunta si un of mas compania a logra obtene incorectamente (un optie) riba terenonan di erfpacht den e periodo di november 2017 pa december 2019, caminda ta investiga tambe e eventual rol di e minister anterior. Den e huiszoekingnan a confisca documentonan y cargadornan di data. Di awor pa dilanti e team investigativo lo analisa e contenido di e administratie y e computernan cu a wordo tuma den beslag y lo scucha e sospechosonan y testigonan.
