Dia 11 februari dia cu e caso a tuma luga, SEPPA a informa di tabata premira cu dia 2 di maart 2022 hues lo no dicta algo concreto como solucion definitivo pa e hecho cu ta kita placa di trahado y obliga trahado traha 100% sino lo bay duna un ‘tussenvonnis’. Pues, SEPPA no a spera cu e solucion tabata di biaha.
Hues di comienso a bisa cu e ta pensando pa pidi gobierno pa bin cu un proposicion structural y nada temporal. Cu esaki el a tira tur cos bek den direccion di Gobierno di Aruba y pa no bin ‘solamente’ na Corte pa prohibi trahado di tuma cualkier accion, sino bin tambe cu loke por soluciona e problema, of kita e inhusticia cu ta kita placa di e trahadonan, of ta spera di e trahadonan pa traha 100% mientras cu no ta paga e trahadonan 100%.
Loke si ta hala SEPPA su atencion cu e resultado di diaranson ta cu durante e tratamento di e caso hues a menciona dos luna di tempo y awor ta wak cu el a pone esaki pa dos siman. Cu esaki e sindicato por bisa cu hues a tuma na consideracion e puntonan cu SEPPA a bin cu ne cual tambe ta desbarata e ponencia di gobierno cu ta di un dia pa otro a bin cu e accionnan.
Loading…
Reload document
Open in new tab Hues na ningun forma a duna rason na gobierno cu loke ta pasando ya pa 2 aña caba esta ta kita placa dje trahadonan di gobierno, di e fundacionnan y di NV, y cu mester keda haci esaki of no ta bisa e trahado ki dia ta stop cu esaki. E meta pa cual a haci esaki NO ta existi mas! No tin Loonsubsidie, no tin FASE y tampoco tin ayudo humanitario mas. Pues ta incomprendibel dicon gobierno ta keda kita placa, cual contrario na e meta stipula den ley cu a sostene e medida aki ya no ta existi mas. Cu esaki caba nan ta wak cu mas bien e trahadonan den lucha tin motibo pa haci loke nan ta haciendo, esta protesta y exigi cu si “nan no ta wordo paga 100% nan no por wordo obliga pa traha 100% tampoco”.
E sindicato ta mira e resultado di e caso aki positivo ya cu hues ta wak dolor dje trahadonan y cu henter e asunto aki di ‘mishi’ den cartera di trahado ta di mas. Ta p’esey hues a pidi Gobierno di Aruba pa dentro di dos siman, dia 16 maart 2022, pa indica cua ta e posibel alternativanan cu ta wordo ofreci cu ta ‘reemplasa’ e kitamento di placa di trahado. Esaki sin ningun forma di uitstel of retraso! Despues di esaki, SEPPA mester duna su contra reaccion. SEPPA ta keda para riba cu mester stop cu e kitamento di placa di trahado y pa mientras cu esaki no sosode e principio “no pay no work” ta conta.
