Un tata ta cabes di cas institui pa Dios y ta deber di tur tata pa no pone esaki na duda den bista di hende, pero tur esaki tin un condicion. E temor di Dios cu un tata tin ta hacie wordo respeta, admira y stima pa su famia.
Pasobra ningun tata ta cabes di cas, pasobra e por grita duro, dal man riba mesa, manipula, e ta violento, e ta spanta su famia y e ta burachi tur dia. Nada di esey no ta cuadra cu e persona cu Dios a pone como cabes di cas.
Cabes di cas ta ora bo tin Dios como cabes di bo bida y bo ta biba den obedencia na e palabra di Dios, den cual bo tin e mandato di Dios pa pas’e over na bo famia. Ta esey ta haci un homber cabes di cas, tur esaki ta bini prome cu placa y propiedad.Pero e mama tambe ta forma parti di e liderasgo di e famia y mesun respet, admiracion y stimacion cu ta brinda na e tata mester ta igual pa e mama.
Como yiu bo no por respeta bo mama menos cu bo tata, pasobra asina ey bo ta completamente robes y bo ta den rebeldia. Pasobra palabra di Dios ta bisa den Efesios capitulo 6 vers 1-4: Honra bo tata y bo mama pa tur cos bay bo bon.Ora nos ta papia di honor nos ta papia di respet, pasobra tin hoben ta pensa cu pasobra mi tata a bisami haci algo mi ta hacie, pero mi no ta worry cu palabra di mi mama. Hoben bo ta robes, mama y tata mester ta respeta igual.
Aunke bo tata y bo mama divorcia of no ta biba hunto, Dios ta demanda respet pa ambos. Asina bo ta kere cu bo por dicidi ken bo ta respeta si of no, bo ta robes. Mantene bo respet y Dios lo mantene su bendicion riba bo bida
P’esey Dios ta adverti e mayornan pa respeta nan mes y respeta nan yuinan pa asina nan por guia nan yiu den caminda di Dios.Pasobra dilanti di Dios e asunto di lanta y educa yiu ta algo masha delicado, responsabel y serio.Y ora nos wak cierto resultado den nos comunidad y nos tende con hoben ta papia y trata nan mayornan nos kier recorda lo siguiente :Proverbionan 20 vers 20 ta bisa: Esun cu maldiciona su tata of su mama, su lampi lo wordo paga den tempo di scuridad profundo.
Esey ta nifica cu cos lo no bay bo bon y lo bo cana den scuridad te ora bo arepenti y drecha relacion cu bo mayornan.Proverbionan 19 vers 26 : Esun cu ta maltrata su tata y core cu su mama ta un yiu cu ta causa berguensa y ta trece reproche.Proverbionan 6 vers 20: Mi yiu warda e mandamento di bo tata y no bandona e siñansa di bo mama.Tanto mama como tata t’ey pa educa nan yiu y guia riba e caminda Dios, nan bon conseho tin mesun balor. Nan tin e mandato y autoridad di Dios pa haci esey.
Y nos ta pidi Dios den nomber di Cristo Hesus pa no bini cambio di ley cu lo minimalisa e mandato y autoridad di mayor, pasobra e ora ey e diabel lo probecha di nos muchanan y kibra famia.Nos mester haci oracion. Dios tene misericordia.
