Proximamente Filomena College, MAVO lo ta celebrando nan 75 aña di su fundacion. Esaki ta un fecha asina memorabel, cu nan no por lag’e pasa bay sin mas.
Addonsito Croes, docente di Geschiedenis na dicho scol pa mas di 11 aña caba, a cuminsa na conta cu tabata na 1947 cu San Nicolas a celebra e apertura di un scol, cu a haya e nomber di Filomena College.
Pa celebra e fecha memorabel aki, dia 25 di juni 2022, scol lo tene un fundraising gala na ocasion di e celebracion di 75 aña di existencia di dicho scol.
E celebracion lo tuma luga den e ballroom di Marriott Resort y su animacion ta na encargo di Musical Time y tambe Robert Jeand’or y su Solo Banda Show.
Entrada pa e fiesta aki ta 75 florin y entrante 10 di mei lo ta disponibel na Filomena College MAVO mes, durante ora di oficina.
Edad pa e fiesta aki ta 21 aña p’ariba y dresscode lo ta ‘gala’.
Loke recauda cu e fiesta aki ta bay pa nan cumpli cu algun meta cu e scol tin pa nan cumpli cu ne. Entre otro un cage unda cu e alumnonan por haci ehercicio riba tereno di scol mes. Tambe nan kier modernisa e televisionnan, pa haci esakinan smart.
Team completo di Filomena College MAVO ta invita tur mayor, ex-alumno, ex-maestronan y tur amigo cu ta stima Filomena College MAVO, pa cumpra un ticket y dia 25 di juni celebra cu nan, nan hubileo di diamanta.
