E comerciantenan den Columbusstraat, cu reintroduccion di AruParking, ta sinti cu awo si e cabuya na nan nek a bira mas strak. Fernando Vermeer, doño di Checkpoint Color, a cuminsa na bisa cu su pasenshi a yega na su limite. Awo no ta solamente AruParking, pero ta drecha e caya den Columbusstraat tambe awo. Esaki no tin niun balor agrega pa su negoshi. N’e etapa aki e no ta import’e con e autonan para, si ta banda di otro, bou di otro.
Loke e comerciante kier pa tur hende compronde, ta cu nan no tin nada contra di e proyecto di embeyecemento di e caya en cuestion. E ta un bunita proyecto, como comerciante e ta para all out tras di esaki. Ta purba yuda te na unda cu por, e no tin nada di keha di e proyecto mes.
Pero door cu e caya ta cera, su negoshi ta esun cu ta sufri bou di dje. No ta bin niun cliente. Pa colmo diahuebs tur e autonan a haya sticker (di Aruparking). El a yega na un punto unda cu e no ta acepta inhusticia mas. Tin un plenchi ful bashi, unda cu por para e autonan eyden. E clientenan cu mester bin cerca dje, no por yega. Pafo di centro di Oranjestad tambe tin luga di potret, unda cu tin luga di parkeer, no tin parkeermeter. E ora, pakico bin den centro e ora? Miho ta move bay pafo di Oranjestad.
Oranjestad a bira un desierto unda cu no tin awa mas pa chica.
