Fundacion Aruba di esunnan Visualmente incapacita ta bay den comunidad pa recauda fondo anualmente. Esaki ta e ta e actividad mas grandi di e fundacion pa recauda fondo. E accion di donacion ta encera cu nan tin boluntario cu ta bay pasa colecta fondo a base di un lista di contribuyente cu nan ta ricibi di e fundacion. Esaki ta un lista di hende y/of organisacion cu pa hopi aña caba ta haci donacion na FAVI.
E collectant su tarea ta pa bay di cas pa cas y haci e trabou cu e trahadonan di FAVI mes no por haci, pues nan ta e ‘brug’ entre FAVI y e instancianan. E fundacion ta gradici e boluntarionan aki pa e trabou cu nan ta haci y tambe a gradici e instancianan pa contribui na nan causa pa asina nan por sigui brinda nan servicio na cada un di nan clientenan.
Si acaso tin un persona cu kier haci un donacion na FAVI tin varios manera pa haci esaki. Prome, por pasa libremente na FAVI pa entrega esaki den persona, por yama e fundacion pa nan bin colecta e donacion of por haci un transferencia bancario di e suma desea riba un di e dos cuentanan di banco di e fundacion. Tambe por haci esaki via e app di pay.aw. Habri esaki y bay riba Good Deeds y hinca e suma cu lo kier aporta. Cualkier suma ta mas cu bonbini y aprecia.
E fondonan aki ta pa sigui brinda servicio optimal na e clientenan di FAVI. P’esey ta keda haci un suplica na e comunidad di Aruba pa sigui haci donacion. Den palabra di e director di FAVI, Cetty Baarh-Bijlhout: “ Yuda nos pa nos por sigui yuda nan”.
