Awe mainta fundacion FAVI a organisa un actividad pa nan clientenan na Baby Beach. Catherine Midi, stagiaire di FAVI y studiante di EPI, a conta cu esaki ta e ultimo siman den cua nan lo organisa actividad pa culmina nan periodo di stage.
Asina nan a haci diferente wega cu e grupo di gym, nan a ranca cabuya, wega di basket, wega di yena hemchi y mucho mas. E mainta a cuminsa pa 9:00 am y un total di binti cliente a participa den e actividadnan y ora cu a termina esakinan, nan por a landa liber den lama.
Cu e actividad aki e stagiairenan kier a stimula e aspecto emocional, social y cognitivo di e clientenan. Pues sigur ta importante pa nan sinti cu nan por forma parti tambe na tipo di actividad di tal indole y disfruta di un dia na lama. Midi a gradici e ekipo di FAVI, e boluntarionan y e otro stagiarenan como tambe Ibisa cu a provee e materialnan pa e actividadnan.
Segun Midi a conta, e participantenan a gosa e echo cu a parti e ekiponan den femenino y masculino y e actividad cu mas nan a gusta ta esun di ranca cabuya. Den transcurso di e siman aki nan lo bay organisa mas actividad cu e clientenan di FAVI.
Pa un relato mas amplio, lesa bo proximo edicion di TREMPAN.
