E situacion cu ta existi awor ta cu di un banda tin ley y e otro banda e aspecto di comprension; ambos ta hunga un rol grandi. Federacion di Trahadonan di Aruba (F.T.A.) a bisa den pasado cu ley di Aruba no ta permiti pa doño di trabou pa corta salario, ora di trabou. Pero bou di e circunstancianan actual e trahado tin cu realisa cu no ta den circunstancia normal. Na momento cu dunado di trabou bin cu propuesta di circunstancianan husto, e trahado tambe mester duna poco cooperacion.
Segun mr. Hose Figaroa, vice presidente y consehero legal di F.T.A., na cierto momento ambos banda tin cu duna di nan mes. Esey ta un di e desaroyonan cu F.T.A. ta siguiendo. Un otro desaroyo ta e peticionnan di parti e gremionan comercial. E sindicato ta preocupa pasobra Camara di Comercio ta parando hopi fuerte riba e echo cu lo mester flexibilisa e leynan laboral di Aruba.
Segun mr. Figaroa den pasado tipo di peticionnan aki a bin dilanti, tempo cu a abusa e ley laboral na 2013. A bin un discusion over di esaki y na final Gobierno a compronde punto di sindicatonan, manteniendo e leynan manera nan ta. Despues a bolbe bin ora cu a haci cambio na e codigo civil, cu ainda no a implementa. E tempo ey un biaha mas e peticion a bin di parti dunadonan di trabou y un biaha mas sindicatonan a para duro riba dje. F.T.A. lo para duro atrobe pa esaki, pasobra e intencion den un tempo dificil di parti dunadonan di trabou kier haci mas facil posibel pa recupera nan negoshi. Di otro banda no por bin na desbentaha di e trahado.
Na momento cu ta cuminsa papia di flexibilisacion, eliminacion di articulo 16 13 X, unda ta permiti uzo ilimita di contractnan di corto duracion, e sindicato no ta bay di acuerdo. Tin e pensamento eroneo bou hopi dunado di trabou cu contractnan di corto duracion aki na Aruba ta prohibi, pero esey no ta e caso. E leynan di Aruba ta regula contractnan di corto duracion, di cual bou cierto condicion por aplica pa un contract di corto duracion. Den caso cu un dunado di trabou ta haya necesario pa aplica esey, ley ta dun’e espacio. Esey no ta nifica cu tin di bay elimina e proteccion p’e trahado, pasobra por tin consecuencianan negativo. Aruba ta e unico pais den Reino cu conoce nan, y no conoce nan sin mas. E ley aki t’ey desde añanan 90 door di mal uzo di stipulacion of contractnan di corto duracion. Si mira e desaroyonan di e ultimo temponan, esaki no ta momento di permiti contractnan di corto duracion sin ningun tipo di control. E clase trahado lo ta hopi mas instabil y cantidad di trahado riba caya lo ta mas halto.
E situacion aki a pone tur hende siña cu mester prepara miho pa tipo di cosnan asina aki, entre otro traha cu reservanan. No ta prome biaha den historia mundial cu un epidemia, pandemia, a presenta su mes. Ta bay yega momento cu ta tuma cosnan “for granted”, unda empresanan no ta prepara pa esakinan. E clase trahado no ta prepara pa tipo di cosnan asina aki. Tin un cultura cu hopi biaha ta biba di pay check pa pay check, sin ningun tipo di spaar of fondo cu por cay bek riba dje den caso si algo inespera sosode. Esey ta un les cu comerciante y trahado tin cu siña pa cuminsa traha cierto reserva. Aunke hende of negoshi ta traha pa sobrevivi, kisas mester ahusta e manera di haci negoshi y manera di biba. A papia hopi di diversificacion di economia di Aruba, pero ta yega cierto momento e parti dificil ta cu comunidad a custumbra biba un nivel basta halto y tin cu ahusta esey.
