Expo “E Lens di mi Wowo” ta habri riba Dia di Prensa

Durante un rueda di prensa na RBC, a anuncia apertura pa e di 12 edicion di “E Lens di mi Wowo” riba dia 1 di september, Dia di Prensa y naturalmente manera tur aña RBC ta sostene e proyecto bunita aki.

Motor di e exposicion aki ta e conocido camarografo y reportero Leo Vrolijk, kende a anuncia cu un biaha mas lo dedica e exposicion aki na varios persona conoci den nos comunidad di prensa.

 

Por lo menos 200 potret lo ta den e exposicion aki, demostrando asina e profesionalismo y beyesa di e ilustracionnan.

E biaha aki a toca turno na Seever Krozendijk y Anthony Carlo. Ademas di esey ta bay tin un premio special, yama Premio Djispie Franken, cu lo otorga na Brian Koolman di 24ora.com

Seever Krozendijk

Seever Krozendijk no ta un persona desconoci den prensa. E ta e cofundador di 297 sports. Seever a cuminsa 14 aña pasa, ora cu el a bay colabora pa un siman cu su omo Andresito Krozendijk prome na Diario y despues na Bon Dia Aruba. El a bay haci trabao p’e, bay reemplase un siman so na Bon Dia Aruba pa motibo di biahe. Asina ey el a cuminsa te dia di awe.

E area di deporte ta un area asina bunita, vooral ora cu cubri nos muchanan mas chikito, con nan ta haci deporte. El a agrega cu nos no tin un cultura realmente di deporte, pero poco poco esey ta cambiando. Sigur ora cu bo wak e manera cu a haya e oportunidad pa cubri nos atletanan afo, por mira e mehoransa den e atletanan, dunando asina e motivacion pa por sigui promove nos deportistanan. Un dia sigur nos sa unda nos kier ta, el a menciona. A logra e prome medaya panamericano dos siman pasa. A marca historia cu esey. Mirando con e desaroyo di deporte ta bay, e input di henter comunidad, Seever ta sigur cu un dia nos lo logra mas halto. Tur hende kier mira Aruba riba e plataforma di deporte mundial y hunto lo logra esaki.

 

Un sosten incondicional

Pierre Rafini, como representante di RBC a menciona cu e ta sumamente orguyoso di tabata parti di e proyecto aki for di un comienso. Ta sumamente importante pa por conmemora e dia aki. Ta kere cu prensa ta hunga un rol sumamente importante den bida diario di tur hende. Prensa local, prensa internacional, prensa skirbi, prensa na radio, con cu bo kier pon’e, sin prensa awe nos no sa ni mita di loke ta pasa rond di nos. P’esey, como RBC, ta sumamente orguyoso di por ta parti di un proyecto asina aki, contribuyendo na e trabao incansabel cu prensa di Aruba ta haci pa nos comunidad diariamente.

Prensa no ta cubri e parti local so. Seever Krozendijk di 297 Sports por ehempel, a biaha tur parti di mundo ta cubri eventonan deportivo cu nos atletanan local ta competi. Esaki ta demostra e amor cu Krozendijk tin pa su trabao y tambe e pasion cu e tin pa deporte. Den su caso tambe Krozendijk ta un di e personanan cu lo bay ta reconoci pa Leo Vrolijk, como un di e periodistanan cu ta destaca den e ramo di deporte.

Anthony Carlo, bon conoci abogado, tambe ta un di e personanan cu lo ta reconoci e aña aki. Carlo ta semper disponibel y a duna su aporte na e deporte di futbol. 

Leo Vrolijk, iniciador di e proyecto aki, ta hopi contento pa e edicion nobo aki y ta hopi gradicido cu RBC pa su sosten incondicional.

Como un di e baluartenan, Anthony Carlo tabata mentor di hopi di e periodistanan di awendia. El a cuminsa cu La Prensa, despues a bay Extra y ultimo tempo e tabata yuda Awe Mainta como boluntario. E gusta su deporte, saca potret, etc. 

Premio Djispie Franken

E aña aki nos a perde un personahe grandi. Nos a perde Djispie Franken y e tabata mentor di mayoria di e periodistanan. Anthony Carlo mes a siña for di Djispie. Leo Vrolijk mes a siña for di Anthony Carlo.

El a remarca cu pa keda recorda kende ta Djispie Franken, a bin cu un premio extra yama Premio Djispie Franken. Esey lo wordo otorga na Brian Koolman di 24ora.com pa su trabao cu e ta haciendo ultimo tempo, e motivacion p’e pa e sigui y for di awo p’adilanti tur aña ta keda saca Premio Djispie Franken.

Tin algun premio so na Aruba, pero pronto lo yega asina leu cu lo bay tin mas premio pa nos periodistanan.

Vrolijk ta gradici tur prensa, fotografonan cu ta presta nan potret pa e exposicion, expresando cu calidad di e potretnan a drecha masha hopi mes.

Diadomingo “E lens di mi Wowo” lo habri pa 7’or y mey na Biblioteca Nacional y lo bay tin un celebracion. E dialuna siguiente, pa dos siman largo, e exposicion ta keda habri pa publico, muchanan di scol tambe por bin wak durante ora di Biblioteca.