Despues di 10 aña yudando boluntariamente tur careda y caminata na Aruba pa cu e siguridad di e participante nan ariba ruta, Volunteer Motor Unit Aruba a lanta nan Fundacion oficialmente.
VMU tincomo 20 miembro cu tin como hobby core nan Harley Davidson y pasa bon cu otro ora tempo ta permiti. Pero practicamente tur diadomingo mainta tempran na unda cu tin un careda of caminata na Aruba bo ta topa e VMUteam. Diadomingo ultimo dia 18 di Februari a toca e biaha aki supervisa nan mesun Walk and Run na Paradera. A dedica e prome edicion di VMU Walk and Run na Jairon J-rod Dania kende ta un di e fundadonan y el a haci aña ariba e mesun dia. E evento tabata “sold out” cu 600 participante den categoria di mucha, hoben, adulto y adulto mayor.
Competencia tabata fuerte y e ruta cu su reto di subida y biento. Pero cu pasion pa e deporte e participantenan a gosa. E evento a inicia na momento cu a start e careda exactamente 6amcue zonido di Harley. Pa 7am a start cu e caredanan pa mucha den diferente categoria di edad cuminsando for di 4 aña. Na final tur participante a haya fruta, Gatorade y awa pa refresca, socialisa y saca potret den espera di e premiacion nan den diferente categoria di edad. Prome cu e premiacion a cuminsa a duna Jairon J-rod Dania un plakkaat como reconocemento pa tur e trabou cu e la haci for di comienso pa VMU. Tambe a duna un regalo na Madel Jacopucci cu a yuda VMU cu e mercadeo y asistencia den e organisacion.
E ganadonan “overall” 6 KM masculino a resulta Jesus Galea y femenino Lana Gobert. Pa resultado por bay ariba www.vmurun.com
Volunteer Motor Unit ta gradici inmensamente tur persona, compania, organisacion nan y demas cu a contribui, yuda boluntario of a sponsor producto of servicio. Cu boso ayudo y sosten nos como VMU, por a realisa e Prome Walk & Run.
Sin lubida e miembronan di Volunteer Motor Unit y tur otro boluntarionan cu a yuda. Na boso tur un danki di curason. Boso aporte valioso y tur e 600 participantenan a haci e evento aki exitoso den su prome salida.
Nos di dos edicion lo ta 2 di februari 2025!!
