Diasabra anochi a tuma luga e di dos festival di Caha di Orgel cu a tuma luga den Fort Zoutman. Organisado di e evento aki Arthur Kelly tabata contento cu a logra haya 10 di e cahanan aki pa participa den e evento cu a atrae basta persona.
E meta tras di e festival aki ta pa promove y preserva e musica di Caha di Orgel. Tipo di actividadnan asina unda cu ta trece famia hunto, ta yuda pa nan pasa rato dushi hunto y laga hobennan tambe cera conoci cu e musica aki y su historia.
El a splica cu Caha di Orgel ta forma parti di Aruba su cultura y nos hendenan mester traha pa preserva esaki pa e proximo generacion.
Promove loke ta di Aruba ta loke cu Fundacion Museo Aruba ta haci henter aña y Festival di Caha di Orgel ta un proyecto relativamente nobo, ya cu esaki ta apenas e di dos aña cu e ta tuma luga.
E organisadonan a keda contento cu e cantidad di personanan cu a acudi y a disfruta henter anochi di presentacion di e diferente Cahanan di Orgel.
