Un biaha mas nos ta na yegando na final di un otro aña escolar y hopi di e studiantenan lo continua cu nan estudionan den exterior.
Algo cu ta bin padilanti cu frecuencia ta e echo cu e studiantenan ta bay studia, sin cu hopi di nan ta prepara of tin e informacion necesario pa ora nan yega na nan luga di estudio. Pa esaki, Mon Plaisir College HAVO a organisa un carriere markt.
Nathalie Richardson, docente di ingles y tambe decano na Mon Plaisir College HAVO a indica cu por ripara cu hopi biaha e studiantenan cu bay studia den exterior, mayoria di biaha na Hulanda, no ta informa di tur e tareanan cu nan lo haya nan confronta cu ne ayabou, ki sorto di profesion tin, pa cual nan kier a haci algo otro.
No solamente e alumnonan di HAVO-4 tabata invita, pero tambe tur e comunidad di Mon Plaisir, pa a bin experiencia esaki. E idea tabata pa haci esaki tur aña pa e muchanan por haya mas informacion. E alumnonan ta e asina yama ‘doorlopende leerling’ cu ta pasa te na Universidad y HBO.
Tin varios scol na Hulanda cu ta bin cu trayectonan asina unda cu e alumnonan ta haya informacion, no solamente di estudio, pero tambe di e diferente trabounan cu tin rond di nan. Meta ta pa e studiantenan ta mas miho prepara.
Richardson a bisa tambe cu e evento a conta cu diferente orador, 22 en total unda cu a bay via un sistema di carousel. Cada mey ora e muchanan tabata por a pasa, unda cu e studiantenan tabata pasa den diferente local, unda cu nan tabata haya informacion riba diferente ramo di trabou.
Riba e anochi aki tambe tabata tin varios profesional den diferente ramo, manera p.e. Antropologo, abogado, periodismo, personanan cu ta traha cu Inteligencia Artificial pero tambe atletanan profesional, manera atletanan di beach tennis y asina por sigui menciona.
Por ultimo, Richardson a bisa di ta sumamente contento cu e agocida ricibi riba e anochi aki. E alumnonan a asisti na grandi n’e anochi aki, cu tabata contene hopi informacion valioso pa cu nan futuro bida como studiante den exterior.
