Un biaha mas Hulanda ta actuando na un forma abusado, menasando y chantahiando Aruba, cu si kier refinancia e 916 miyon florin cu a fia pa motibo di e efecto devastador di e pandemia, mester acepta e RAF of paga e suma completo na october proximo, loke logicamente ta un locura politico di muestra di poder, ta loke ex-prome minister di Aruba, Nelson Oduber a publica riba su pagina di Facebook.
E ta sigui bisa: “Awo dicon nos a fia e suma??? Door cu nos ainda ta den Reino, tin un articulo 36 di Statuut cu ta bisa cu: ”De landen in het koninkrijk verlenen elkaar wederkerig hulp en bijstand”. E articulo a bin den e Statuut pa nos keda den Reino,” ta loke el a indica.
Hulanda a priminti Surinam na 1975 “een generatie ontwikkelingshulp” cu nunca nan a cumpli, basta nan bira independiente.
N’e Conferencia di Mesa Rondo na Corsou dia 26 november, 2005, Hulanda a priminti Corsou cu nan lo duna nan kwijtschelding di nan debe basta nan acepta un CFT cu a bin a base di un Rijkswet. E cos aki segun IMF den un rapport a stroba Corsou hopi den nan accionnan pa crece economicamente. E posicion tin ora hasta tabata mal uza politicamente.
“Awo ata Hulanda ta bisa Aruba si boso bay refinancia e 916 miyon florin tin un “dode letter” den Statuut articulo 29 cu boso mester mi aprobacion, mientras den e ley ta para “koninkrijks ministerraad”. Realidad politico ta esun cu e placa al final ta dicidi y ta esaki nan kier bisa nos. Laga mi comparti locual e gobiernonan cu ami a guia a pasa aden cu Hulanda. Ora nos a drenta gobierno na 1989 nos a confronta cu e realidad cu Hulanda den conseho di minister di Reino a aproba tur e 3 garantianan cu Gabinete Eman a duna ‘back to back’ na tanto e banco di exportacion Italiano “SACE” y e banconan cu a fia e desaroyadonan di e tres hotelnan cu nunca a termina. Gobierno Hulandes a duna aprobacion di e proyecto nan, unda e estafadornan, mafia Italiano tabata envolvi sin ningun dia a screen e gruponan ni e modus operandi di e Italianonan no solamente na Aruba, pero riba varios otro isla den Caribe. Di financia hotelnan, otro cos sin termina e proyectonan y placa ta caba na caminda!!!!”
“Nos gobierno na 1988/90 mirando e debe di casi 400 miyon florin cu Aruba a confronta cu ne, nos a base di articulo 29 di Statuut a pone Hulanda coresponsabel p’e debe y a laga pone esaki riba agenda di un reunion di Conseho di minister di Reino. E tempo ey Wim Kok dfm tabata minister di finansa di Hulanda y ami cu ne a discuti e issue. Ami, personalmente y el a bisa mi textualmente ”De Nederlandse belasting betaler zal niet bloeden voor de co-secuentids van de gegeven garantie en Nederland draagt geen enkele berantwoordelijkheid. Het is een formaliteitartikel 29 Statuut.” Despues mi a bay discuti cu mr. Jan de Koning, e minister cu tabata encarga cu nos asuntonan y e di cu mi cu ta “onder het drinken van een kopje koffie“ a aproba e garantianan. Pero esaki no ta trece ningun responsabilidad pa Hulanda.
Despues un corte a sentencia Aruba pa paga “SACE”, pasobra nos a duna e garantianan. Nos a pidi Hulanda ‘ban Roma cu nos pa negosha e asunto aki cu “SACE”’ y nan a nenga categoricamente. Mi a bisa nan cu boso ta den Union Europeo cu Italia y lo por yuda, pero nada. Despues mi a pidi nan pa laga nos embahador di Reino adhunto pa Hulanda compaña nos na Roma pa mustra Italia cu Hulanda ta sigui e desaroyo. Nan a nenga, bisando mi cu si e embahador bay cu nos pa negosha cu “SACE”, esaki por crea e impresion cerca e Italianonan cu Hulanda lo ta responsabel y lo ta bay paga. Sin ningun apoyo di Hulanda mi a negosha un descuento di 110 miyon dollar cerca “SACE”, a paga nan cash 55 miyon dollar y cu un interes abou a keda paga 15 aña largo y 2 aña pasa nos a caba di paga e desaster, e vupa, e mafiamento den e garantianan p’e tres hotel cu a laga na ruina.
Real story cu ami a pasa cu gobierno Hulandes cu te awe desde 1986 a paga ningun, pero ningun debe pa Aruba. P’esey e menasa cu si nos fia den exterior nan por stroba nos, segun nan interpretacion di articulo 29 di Statuut ta un ”wassen neur y un dode mus”. Nan mes a core p’e tempo di e garantianan.
Mensahe na gobierno di nos, sigui busca refinanciamento den exterior y no acepta chantahe. Muri sigur nos lo no muri. Nos demostra cu nos despues di ciere di e refineria na 1985 a sali afo, cu e garantianan ni cu e pandemia COVID-19. Corda ta fia nos a fia placa y no ta regalo nos a haya. Un contribucion di a negosha masha hopi biaha cu e gobiernonan Hulandes.
KEN TA NEL ODUBER
Nelson Orlando (Nel) Oduber 7 di februari 1947 na San Nicolas ta un ex-politico Arubano. E tabata Prome Minister di Aruba; pa prome bes na 1989 te 1994, ora su partido a perde, pero djey el a bolbe bira prome minister riba dia 30 di october 2001 te 30 di october 2009. Di 1986 te 2011 e tabata lider di e partido Movimiento Electoral di Pueblo, partido geel (MEP).
Biografia
Oduber a nace dia 7 di februari 1947 na Lago Hospital na San Nicolas como yiu di Urbano Oduber y Carmen Felepina Croes. El a lanta den bario di Siribana den un hogar catolico. E tabata forma parti di e famia grandi consistiendo di nuebe yiu homber y cuater yiu muhe.
Oduber ta casa cu Glenda Croes y hunto nan tin tres yiu homber. Esun mas jong, Dangui Oduber, ta activo como politico desde 2013 y como minister desde 2017 te cu awo.
