Nos mester estrecha e lasonan den Reino Hulandes mas aun y concentra riba e aspectonan positivo di Reino Hulandes.’ Esaki tabata e mensahe di Minister van Staat pa Curaçao y ex gobernador di Antia Hulandes mr. Jaime Saleh den un encuentro cu ela tene pa e tres Ministernan Plenipotenciario y ambtenaarnan di e ministerio di BZK, ministerio pa Asuntonan Exterior, ministerio di Defensa y e Gabinete di Rey.
Mr. Saleh a sigi bisa cu e ta mira un rol principal den esaki pa tanto e tres Casnan como tambe e ministerionan cu ta encarga cu asuntonan di Reino. ‘Reino Hulandes ta consisti di cuater pais y esaki ta trece cune un diversidad hopi grandi. Na mes un momento esaki ta nos forza pa maximalisa e potencial cu Reino Hulandes ta brinda,’ asina mr. Saleh a bisa.
Minister Plenipotenciario Guillfred Besaril a haya e encuentro hopi inspirativo y caluroso. ‘Mr. Saleh ta un defensor encansabel pa optimalisa e potencial di Reino Hulandes. E ta un persona cu hopi autoridad riba e tereno aki y cada biaha sr. Slaeh ta mustra cu nos mester mira riba loke nos ta comparti cu otro y no riba e diferencianan entre e paisnan,’ asina Minister Besaril a remarca.
