Den luna di maart 2023 prome minister a nombra Joselin Croes como candidato pa bira director di Arubahuis. Joselin Croes ta Minister Plenipotenciario na Washington, Merca, desde e prome gobernacion di Gabinete Evelyn Wever-Croes. Den conferencia di prensa di awe Prome Minister mr. Evelyn Wever-Croes a informa cu nan a nombra Joselin Croes como e director nobo di Arubahuis.
E mandatario a splica riba e proceso di nombramento pa e vacatura di director di Arubahuis tabata poni aña pasa den luna di juni. El a splica cu esaki tabata prome bes den historia di Aruba, den cuadro di integridad cu gobierno a dicidi di haci e nombramento uno no politico. A opta pa habri vacatura y candidato por solicita. Te cu awo e director di Arubahuis ta apunta p’e gobierno y tabata sinta eynan p’e periodo di gobernacion.
Wever-Croes a splica cu nan ta di opinion cu pa por sirbi e mision y vision di Arubahuis miho, mester tin un director cu no ta depende ken ta den gobierno p’e ta eynan. Si no tin un persona structural eynan. Gobierno a institui un comision cu tabata encarga cu e vacatura. Den e comision tabatin Departamento Recurso Humano, Departamento di Impuesto y un representante di Ministerio di Asuntonan General.
Un total di 23 persona a solicita p’e posicion di director di Arubahuis. Minister Wever-Croes a splica cu a base di e criterianan cu e comision a establece, a scoge tres candidato. Na final di september 2022 a tene un entrevista cu cada uno. A base di esey y mas test haci, e comision a considera Joselin Croes como e miho candidato pa ta director di Arubahuis.
Pa mas lesa TREMPAN.COM.
