A para e proyecto di Secrets Resorts y esey tin di haber cu algun shoco. San Nicolas Business Association (SNBA) no ta di acuerdo cu esey. Bin cu e hotel na San Nicolas ta sigura trabou pa hopi persona.
Errol de Freitas, presidente di San Nicolas Business Association, a expresa cu nan a bin dilanti pa defende un proyecto cu por cambia e rumbo pa San Nicolas y pariba di brug. E proyecto tin un balor di miyones. Pa loke ta encera cuanto famia lo por haya trabou na Secrets Resorts, el a enfatisa cu ora e proyecto ta bay door por calcula tres empleado pa cada camber.
Hues a dicta pa stop cu e proyecto, a puntra de Freitas riba e echo si nan lo demanda e ciudadanonan cu a pidi pa para e proyecto di hotel pa daño perhuicio. El a enfatisa cu nan no ta un gremio conflictivo, pero tin cos cu ta den nan poder y cu nan por haci. Sinembargo si nan por tin e audiencia ey y si directiva dicidi cu mester bay hues, pasobra nan mester confia den sistema legal. Aki na Aruba ta gusta papia di bringa so, esey ta algo cu ta weita constantemente.
De Freitas ta kere cu tin suficiente hende capaz. E ta imagina cu e hotel Secrets tin su representante y cu gobierno ta haci loke nan ta haci. Pasobra e no ta kere na ningun manera cu gobierno no kier e proyecto aki.
Si e hotel aki yega San Nicolas e lo boost economia? El a expresa door cu tur hende cu ta traha pabou di brug e pregunta ta cuanto nan lo spaar na gasolin so. Sin lubida e trafico cu lo sigui bay pariba di brug. Ta papia di 600 camber y aki ta por lo menos 1200 hende lo keda semanal eynan. E cos aki tin un ‘spin off event’ p’e companianan di huur auto, restaurant, tur cu lo bay pariba. Definitivamente comercio ta bay disfruta di e otro proyectonan cu ta den pipeline.
El a reacciona riba e echo cu si a para e proyecto pa motibo di shoco. El a expresa cu aki na Aruba ta scucha diferente caso. “Acaso e shoconan ta biba na San Nicolas so? Den Colony so tin shoco? No tin shoco na Eagle, no tin shoco na Moko?”, el a indica. E ta expresa unda ta haya yen di shoco ta n’e tereno banda di DIMAS. E kier sa di unda e combersacion a bin, pasobra tur cos tabata cubri cu e departamento di medio ambiente. A haci tur estudio pa asina e hotel por bin eynan. De Freitas ta corda cu eynan mester a bin un otro hotel prome, y a haci tur estudio. Ningun gobierno di ningun signatura no por bisa cu e intencion di traha hotel eynan tabata eminente. E ta ancra den RBV cu e cosnan aki ta pa leisure, pa turismo.
Prome cu tur trabou a cuminsa, tur departamento concerni a haci nan trabou. Hopi hende di placa por rek cos manera cakiña, caso tra’i caso te ora e hotelero, e doñonan di e proyecto fada.
