Confiansa ta no ta algo cu cay for di cielo y no ta un cos dia anochi pa mainta. Confiansa bo ta crea ora bo ta cumpli cu palabracion haci. No por ta asina cu bo ta firma un acuerdo y bo no ta cumpli cu ne. Nos tur sa cu Hulanda no tin confiansa den e gobierno di Aruba paso nan no ta cumpli cu locual cu nan ta firma. No ta un secreto cu e landspakket ta den su fase pa wordo implementa. No por papia di negociacion paso esey a tuma luga caba. Locual cu tin cu tuma luga ta e contenido cu a firma diabierna 13 di november 2020.
Gobierno ta reuni cu sindicatonan pa gana tempo y no tin seriedad den e negociacion. Esaki ta simplemente pa gana tempo. Locual cu mester tuma luga ta ki dia cierto medidanan mester tuma luga. Locual cu gobierno no wordo implementa den su tempo a wordo hala pa un otro fecha. Riba agenda di landspakket tin e cambio di LMA y mester wordo trata den parlamento proximamente pa por reduci e empleadonan gubernamental.
E medida di 12.6% a wordo proponi pa gobierno di Aruba y e identidad Hulandes a tum’e y impone riba demas islanan. E medida aki a cay den mal tera riba cerca e otro islanan. Nos ta corda riba un dialuna a bay asina leu di bisa e sindicatonan cu lo no mishi cu salario di empleadonan publico y hasta a firma un acuerdo cu lo no kita placa for di nan salario. E siguiente dia e empleadonan publico ta ta haya sorpresa di nan bida ora cu nan a mira nan payslip. A baha nan salario cu 5%. Bo no por spera otro di un gobierno cu ta falta integridad. Locual cu a pone awa pasa hariña ta ora cierto nv’s di gobierno no a entrega e 12.6%. Akinan a keda demostra cu no tin transparencia y a caba di termina cu e tiki confiansa cu ta keda den gobierno. E entrega supuestamente lo mester pa yuda esunnan cu a perde entrada y esaki a resulta den un otro engaño. E actitud di gobierno cu si bo no ta gusta mi ta hascie ley a cay den mal tera. Bo no por negocia cu machete riba mesa.
FASE y loonsubsidie a wordo subsidia cu placa presta for di Hulanda. Un prestamo y no un placa regala. Un otro peso riba lomba di nos pueblo sin conta e prestamo aña pasa y esun di 84 miyon florin di e aña aki. 80 miyon florin di mas a wordo paga. SVb a logra recupera 8 miyon cu a wordo paga di mas y ainda tin 72 miyon di FASE y loonsubisdie ta riba caya. Ken ta para responsabel pa esaki? Conclusion ta cu no tabata necesario pa kita 12,6% for di e empleadonan publico mas ainda cu no ta tur nv’s di gobierno a entrega e 12.6%. Mas cu un aña largo empleadonan publico a entrega mientras cu e otro institucionnan di gobierno no a entrega. E situacion a bira pio ora a yega na orea cu cierto nv’s nan si ta haya diferente beneficio. Esaki ta causa cu no tin confiansa mas den gobierno y a pone cu e situacion a bira mas pio.
Cada dia e gobierno aki sin integridad keda mas nan ta hinca e pueblo di Aruba den problema. Un placa mal ranca lo bo no goza di dje.
