Nos por a mira cu lider di partido RAIZ mes ta toca y e mes ta baila. Despues di a comete un blunder awor ta trata di suavisa e asunto. E daño ta haci caba. Nos no por compronde con e lider di partido RAIZ ta hinca den su cabes pa hiba su mesun gobierno corte. Mas tristo ta cu bo ta mira e minister ta bay pa para e trabao dilanti di Embassy Suites y ta haya un cara abao. E tabata tin e curashi di bisa cu su persona como e minister di naturalesa tin e poder pa para e trabao. E minister kier proteha nos mangelnan pero te dia di awe e no ta zorg pa nos beachnan no wordo contamina cu e awa sushi cu ta sali for di Bubaliplas.
Ora bisa cu e cartera di e minister ta un pret pakket e mester realisa cu e no tin ningun poder y cu e poder ta cay bao di e minister encarga cu infrastructura. Ainda pueblo ta warda pa gobierno anuncia cu lo haci algo pa stop e holor desagradabel cu e planta di purificacion na Bubaliplas ta causa. Gobierno no tin urgencia cu e planta di purificacion na Bubaliplas paso for di e rapport cu a bin den publicidad na aña 2021 tabata mustra e urgencia y te cu dia di awe nada a wordo haci. Nos por corda cu a habri e sloot den laat di anochi y laga e awa sushi bay lama. Ora esaki a bira conoci a manda esaki patras di Tierra del Sol. Den un habri y cera di wowo ta hinca e RioolWaterZuiveringsInstallatie den man di Utilities. Tabata tin 4 sentencia cu a cay contra di gobierno pa via di no a haci nada riba e planta di purificacion na Bubaliplas pa alivia e bisindario di holo stinki na restaurantnan y hotelnan y riba dje gobierno tin 1 miyon pa paga na dwangsom paso no a cumpli.
E reunion cu caracter di urgencia diadomingo anochi na cas di lider di partido RAIZ a demostra cu e lider a bay na rudia pa e prome minister. El a sali afo y bisa cu partido RAIZ no ta bandona gobernacion pa via di interes general. En bes cu e lider a sinta cu prome minister internamente a dicidi di busca un confrontacion publicamente. Nos ta kere cu nos prome minister su publicacion diadomingo a pone e minister di partido RAIZ para keto y yama un reunion urgentemente pa mira con partido RAIZ ta para. E matrimonio aki ta consisti di partido mep y partido RAIZ. E publicacion di prome minister di diadomingo a manda un mensahe bon cla pa partido RAIZ. Nos ta kere cu e sumpiña cu partido RAIZ a claba den curason di nos prome minister lo keda sin consecuencia. E sumpiña ta claba te profundo di alma di nos prome minister paso e ta un humiliacion grandi. Esaki ta pasa ora cu un partido politico no ta respeta leynan di Dios. Papa Dios no ta bisti pidjama y Su tempo ta perfecto.
Nos Dios conoce nos curason y E sa cu aki na Aruba tin un sirbidor cu no ta dobla pa cosnan cu ta contra Dios su boluntad. Partido CURPA t’e unico alternativa.
