Reces a pasa y nos parlamentarionan mester prepara pa reunionnan. Despues di a tuma 6 siman di vakantie nos prome minister ta prepara pa bin Parlamento pa locual ta trata e 916 miyon cu gobierno a fia for di madre patria Hulanda. Gobierno su lomba ta contra muraya paso ta un suma cu gobierno no tin y lo tin cu tuma un decision. Mas pio ainda cu e 20 miyon florin na bondnan pa un termino di 3 luna gobierno no a logra di cera.
Gobierno Hulandes ta demisionario pero ainda tin e poder pa pone un fin na e bay bin di nos gobierno. E COHO cu nos prome minister a bay di acuerdo cu n’e y a firma riba e diabierna scur di 13 di November 2020 tin consecuencia pa Aruba su autonomia. Un di e puntonan den COHO ta pa baha e cantidad empleadonan publico cu entre 1500 pa 2000 empleado. Omo a logra Status Aparte y sobrina a entrega e Status Aparte. Den añanan 70 partido MEP a uza 12-8 pa cabay di campaña. Esunnan cu a sali for di partido AVP y a funda partido MEP e tempo ey tambe a forma parti di e 12-8.
Aruba ta nabegando sin un rumbo fiho y parce cu nos prome minister no ta interesa mas den ki direccion isla ta bay. Un cos ta sigur cu nos prome minister ta planeando algo. E lo bay sali na claridad. Esaki no ta e Aruba cu nos grandinan a laga atras pa nos. Hopi di nos no por identifica nos mes riba e isla aki. Materialismo a domina idealismo y esey a hiba nos Aruba den un direccion ekiboca. Nos no por papia di un progreso pa mayoria di nos hendenan. Nan placa no ta yega fin di luna. Si na Hulanda mes ta papia di cu 6 di 10 hende ta biba den pobresa anto kico nos por bisa nos yiunan di tera. Turismo ta bay bon pero e caha di gobierno tin un buraco grandi paso nos debe nacional a sigui crece for di 2017 pa awe den 2023. Gobierno kier tira culpa riba e gobierno di AVP pa 1.8 biyon di debe pero e gobierno aki tin mas cu 2 biyon florin crea na debe.
Nos a haya informacion cu e Hulandesnan ta screen departamento di gobierno. E meta tras di esaki ta pa cera departamento cu nos mester di dje y otro lo mester bay privatisa. Privatisacion ta mustra bon pero na final di cuenta ta ranca e placa mal ranca for di cartera di pueblo. Ehempel di privatisacion tin hopi y tambe cu di berdad ta genera entrada y ta auto sostenibel. Ni e companianan estatal a scapa gobierno paso nan a wordo uza como garantia di prestamo riba mercado internacional y riba dje e companianan aki mes a haci prestamo. Esaki kiermen cu e companianan estatal aki tin dobel debe. Esaki ta haci cu pueblo no por haya awa y coriente na un miho prijs. E companianan aki ta esclavo di debe.
Diamars awor lo bay tin un reunion publico pa trata e prestamo di 916 miyon florin. Si gobierno no acepta e RAFT anto lo mester bay paga e 916 miyon florin na 8%. Segun nos por a compronde cu e Hulandesnan a cansa di e falta di madurez di nos gobierno y tin un KB pa Ministerraad riba mesa. Gobierno mester bay tuma decision den e dianan nos dilanti. Asina ta diamars nos por mira e comedia cu lo tuma luga den Parlamento.
Hopi importante pa pueblo di Aruba ta na altura cu lo bay pusha un otro arma biologico pa bolbe bin cu un lockdown den lunanan nos dilanti. Situacion economico mundial lo bira pio cu introduccion di e moneda di BRICS cu ta 1 pa 55 dollar. Esaki ta mustra cu e dollar lo perde su balor. Merca ta pasa den un situacion dificil cu lo bay afecta biahamento cu lo tin consecuencia pa Aruba. Pa introduci e moneda digital e banconan lo bay crash y lo cera nan porta pa un tempo. Lubida riba swipe. Zorg pa tin cash.
Dios lo no laga nada scondi y ta saca tur corupcion na luz di dia. Nos ta kere cu ora di yega pa e gobierno aki bay cas paso nan desastre lo persiguinan. Pueblo nos ayudo ta bin di Dios y ningun politico lo por trece un cambio si e no tin Dios den su bida. Aruba ta na unda nos ta awe pavia di a wordo goberna pa hendenan studia pero sin principio y sin temor di Dios. Hendenan cu ta bay contra leynan di Dios. Aki ta na unda partido Curpa ta e unico alternativa.
