Mundo henter ta conmemora e fecha 10 di december, stipula door di Nacionnan Uni, como Dia di Derecho Humano. E ta un fecha cu na Colegio EPI a bin ta celebra e fecha aki di diferente forma.
E ultimo añanan, segun Irina Croes (trahado social), a celebra esaki organisando charla pa e studiantenan. Tur e charlanan ta enfoca riba e diferente derechonan cu ta existi tanto pa mucha como pa adulto.
Sinembargo e conmemoracion manera cu a tuma luga den pasado, no por sosode mas. “Nos ta conmemora e fecha pero di un otro forma.” El a splica cu nan di EPI a bisti e lint oranje cu ta e color pa conmemora e fecha di 10 di december. Ta entrega e lint pa bisti dunando un splicacion di e dia.
E fecha ta uno cu no tabata haya hopi atencion y esey ta e motibo cu tres aña pasa a cuminsa pone enfasis riba dje, pa siña e alumnonan e importancia di Derecho Humano. E ta sigur cu hopi hende awe lo puntra un persona cu un lint oranje bisti e motibo di esaki. Aki ta caminda cu e splicacion ta bini y mas hende ta educa nan mes di e forma aki. Poco-poco mas persona ta haya mas informacion.
EPI tin tanto docente como studiante cu deshabilidad y semper ta enfoca riba nan derecho tambe como ser humano. “Niun momento nos kier pa nos studiantenan of coleganan sinti cu nan no ta welcome. Nan ta forma parti di e grupo di EPI,” Croes a splica.
