Tin hopi alumno di Colegio EPI, no ta mucho contento cu lesnan online. E proceso di cambia di bay scol tur dia pa haci les online, ta birando un dificultad grandi pa nan.
Anaika Flores, PR Colegio EPI, ta splica cu e ta un hecho cu e cambio ey di dunamento di enseñansa live, face to face den klas pa un modelo hibrido of un modelo online, a causa problema pa tur hende, tanto pa studiante, pa docente, pa directie. Pero e ta algo cu ta purba di traha riba dje tur dia pa mehora esaki.
Flores ta sigui splica cu tur hende ta consciente cu e problemanan ta di esunnan mas simpel, por ehempel di e falta di tecnologia adecua, te esunnan di mas complica. E sensacion no ta mesun cos pa e studiante.
E studiante ta custuma di ta den klas, den presencia di su compañeronan di scol y su docente cu ta haci cu e comunicacion hopi mas facil. Esey a cambia drasticamente y ta un punto cu a exigi hopi atencion di e scol como organisacion pa por hacie menos traumatico posibel.
E cambio pa bolbe bek na normalidad, ta depende di e desaroyo riba mundo en general. Segun Flores, tin cu tuma tur cos di dia pa dia y mira kico ta e dificultadcu e ta toca y con pa haci pa remedia esey y pa haci e situacion mas agradabel posibel. No solamente pa e studiantenan, pero pa e docentenan tambe.
