Minister Glenbert Croes a percura pa pone Enseñansa pa Empleo (EPE) bek riba pia, door di amplia e cantidad di curso pa yuda ciudadanonan recapacita nan mes conforme e demanda laboral. Na mes momento ta enfoca riba cursonan cu por yuda tur hende provee pa su mes, su famia y si por hasta pa comercio. EPE den cooperacion cu Santa Rosa, ta instrui esunnan interesa con pa bira agricultor di tur locual cu a por cultiva aki na Aruba mes.
Riba dia 3 di maart ultimo, e prome grupo di cursista di horticultura a termina e curso cu exito. Manera a menciona anteriormente, e curso di horticultura ta un colaboracion entre Enseñansa pa Empleo y Santa Rosa. E curso ta parti den dos parti, cu ta teoria y practica. Santa Rosa ta ofrece ambos materia y pa practica ta bishita diferente sitio di agricultura y plantacion. E teoria ta pa siña e cursista e miho tecnica pa planta y cultiva, mientras e practica ta pa realmente siña planta, explora e diferente tecnica y tambe diferente tera di cunucu y verifica pa cual producto e tera ta apto.
E siguiente curso lo inicia dia 3 di april proximo. Si ta interesa por yama EPE libremente of bishita e website di www.epearuba.com of via facebook @Enseñansa pa Empleo.
