Awe, diaranson, 27 di Februari, a ranca sali e proyecto di embeyecimento di Malmok. Un proyecto cu ta wordo cubri tambe pa fondonan di turismo, pa e area turistico aki.
Minister di turismo, Dangui Oduber a splica cu esaki lo ta e prome fase di e proyecto Boardwalk. Como politico y den bida semper tin cu bisa loke cu ta bay haci y ora bo haya e oportunidad, haci tambe loke bo a bisa.
Den e caso aki, a bisa for di tempo cu tabata den oposicion, durante temporada di campaña cu lo desea pa upgrade e area aki. Bin cu un boardwalk pa garantisa e siguridad pa tur esnan cu ta haci uzo di e area aki. Ora cu pasa atardi mes, ta hopi ta e peatonnan, hopi ta e deportistanan cu ta haci uzo di e area aki, pa haci ehercisio. E no ta un luga sigur, safe pa esnan cu ta haci uzo di e area aki. Ta hopi ciclista y peaton a wordo gedal den e area aki.
Minister Dangui Oduber ta un hende cu gusta y haci deporte y a haya e oportunidad pa haya un bunita cartera di turismo, salubridad y deporte. Un combinacion perfecto cu e por ehecuta un maneho y un vision manera cu e kier. Parti di e vision aki ta bin cu areanan di ehercisio pa comunidad tin acceso na nan. Awe a duna inicio di e prome fase. Ta contento tambe di e proceso cu a encamina. E proceso aki a bay den un dialogo continuo cu Preserva Malmok, pa asina duna nan tambe e input necesario, tur esnan cu ta biba den e area aki, cu kier mantene nan paz y trankilidad cu nan ta biba cun’e den e area.
Den un dialogo continuo, a trece varios sugerencia dilanti, con nan kier mira e proyecto aki y tur e sugerencianan aki a wordo inclui den e plan. Por ehempel lo purba limita daño riba naturalesa, evita pa mishi cu e naturalesa. Lo bay haci hopi uzo di palo, enbes di concreet. Lo bay tin un bocht paden cu lo bay haci uzo di palo. Lo bay bin un muraya pa proteha e turtuganan, un asina yama Turtle Wall. Ta sugerencia y consehonan cu a bin dilanti for di e area Preserva Malmok. A tene debido cuenta cu nan pa asina nan tambe por ta contento cu e proyecto aki ta bin, pasobra e punto di salida di e proyecto aki ta pa tin un area safe y sigur pa hendenan cu ta haci ehercisio.
Sigur cu e proyecto aki por garantisa cu tin un area hopi safe, sin mishi mucho cu naturalesa, ofreciendo e proteccion necesario na medio ambiente. Incluyendo cu e turtle wall, haciendo uzo di palo. Asina ta cuminsa cu ehecucion di e proyecto. E fondonan aki ta wordo poni disponibel door di e presupuesto di TPEF (Tourism Product Enhancement Fund). E proyecto aki ta conta den dos fase. Fase 1 ta e aña aki. Fondonan a wordo inclui caba pa e presupuesto di 2020, pa asina e proyecto aki termina den su totalidad lo wordo finalisa. E boardwalk ta cuminsa for di e crusada di Boca Catalina te cu Fishermen Hut. E mandatario kier a gradici preserva Malmok pa nan cooperacion y input cu nan a duna durante henter e proceso aki. Ta gradici tambe DOW pa tur e cooperacion. Nan ta encamina e proceso di destaho, nan ta tene supervision. Un compania di construccion local a gana e destaho publico.
Esaki ta algo sigur cu ta positivo y un contribucion positivo pa crea empleo y un estimulo pa economia local. E inversion pa fase uno ta 1.4 miyon florin y pa fase 2, ta rond di 1.2 pa 1.4 miyon tambe. Den su totalidad ta papiando di un inversion total di casi 3 miyon florin pa henter e area aki cu lo resulta sigur den un upgrading pa e area aki cu ta wordo hopi uza pa e turistanan. Minister Oduber a splica cu esaki tabata un parti importante pa mantene e trankilidad tambe. Pesey den e planificacion a tene cuenta cu tur esaki pa crea un parada di bus tambe y crea espacionan di parkeo.
Kier bay organisa esaki, structur’e mas miho.
Tur esaki a wordo hinca den e planning na momento di proceso di planeamento di Boardwalk. Preserva Malmok ta un comision di e habitantenan di e area aki. Na momento cu e proyecto aki a keda anuncia, diferente reunion a wordo teni cu nan, pa nan expresa nan preocupacionnan. Un di e preocupacionnan cu nan tabata tin pa mantene e paz y trankilidad den e area aki. Otro preocupacion tabata pa conserva e medio ambiente, pa limita e daño na medio ambiente lo maximo posibel. Loke a haci ta haci uzo di menos concreet posibel.
