Pa garantisa un suministro confiabel di coriente, Jonathan van der Linden, maintenance specialist di Elmar N.V. a splica den un entrevista cu semper ta busca pa amplia e red di distribucion caminda cu ta identifica cu ta necesario. Si, por ehempel, sa cu un area su consumo ta bay subi pasobra tin un bario nobo, ta pasa kabel/red cu capacidad mas grandi pa e area.
Pa loke ta trata barionan existente, Elmar N.V. sa cu, por ehempel, Palm Beach/Noord ta un area cu ta consumi mas coriente. Segun van der Linden, esey por ta door cu e casnan ta mas grandi, e airconan tambe ta mas grandi, e pool tin pomp y tin extra aparato den cas cu ta consumi coriente.
Di otro banda, earea cu ta consumi menos ta pariba di brug. Aki tin un mezcla di bario cu ta consumi e cantidad promedio of menos. E motibo di esey por ta un combinacion di menos aparato y cu ta mas consciente den consumo.
Si ta bay compara e consumo total na Aruba cu un otro pais den region, Elmar N.V. a duna di conoce cu e cantidad di coriente cu ta uza riba nos isla ta 50% mas cu, por ehempel, Corsou. E cas promedio na Corsou ta consumi 325Kw/uur, mientras cu na Aruba ta 700 Kw/uur. Aunke no tin un estudio pa determina kico ta e causa, por pensa cu ta trata di e prijs di coriente cu ta mas halto na Corsou y Boneiro, obligando e usuarionan nan limita e consumo.
Di otro banda, van der Linden ta admiti cu tin hopi penetracion di energia solar. E peak di 2’or di atardi a bin ta cuminsa baha poco pasobra e solar panels ta produci mas den e mesun orario aki. Actualmente tin 14 Mw di instalacion aproba di cliente riba dak comercial y/of residencial. E demanda total di Aruba ta di 130Mw.
Na sede di Elmar N.V. na Wilhelminastraat tin un sala central caminda tin un sistema di distribucion na escala cu ta indica for unda ta cumpra e coriente di WEB te na e shete substacion principal. Di e shete substacion ta bay na 1.200 cas di storing rond di e isla.
Tanki Leendert, por ehempel, ta un substacion cu tin un combinacion comercial den dia y anochi residencial; e ta cubri parti di playa tambe. “E ta un stacion cu semper nos ta wak e demanda ta halto,” asina van der Linden a duna di conoce.
Durante ultimo aña Elmar N.V. a keda automatisa pa por haya mas informacion di e sistema computarisa. Awo, ora cu tin un storing, ta haya sa mas lihe, por avisa na e residentenan di e area kico ta pasando y ta reestablece e coriente mas lihe tambe. Den mayoria caso, esaki ta sosode den 30 pa 45 minuut.
