Doño di celular no a perde speransa. Na momento cu nan a horta su celular, el a ‘track” esaki y a yega te na e sospechoso cu a hort’e. Mesora a pone autoridad na altura cu nan tin un persona wanta, y ta warda nan yegada.
E sucedido a tuma luga den careda di 1:00 pm ora cu a bati alarma pa un ladron cu a drenta un cas na Bernhardstraat San Nicolas y pasa man pa un celular y sali na careda. E victima, acompaña pa su tata, a subi caya pa en busca di su pertenencia.
Den Rembrandstraat nan a canta bingo, pero no a lgra recupera e telefon door cu e sospechoso a bend’e caba e momento ey. A laga patruya yega y atende cu e ladron mientras nan a continua nan buskeda.
Nan no a descurasha y a sigui ‘track’ e telefon. E no tabata leu, nan a presenta den area di un cas caminda tabata duna indicacion cu e telefon ta cerca. A bolbe tuma contacto cu polis pa avisanan cu a localisa e telefon y tin un sospechoso na bista. Polis a presenta un biaha mas y e biaha aki a detene un persona cu tabata e cumprado. Tin cu warda riba e investigacion pa asina e persona por recupera su pertenencia.
