E nomber por ta zona conoci, pero probablemente bo ta pensa riba su tata, cu tabata un di e top recherchenan di nos isla y tin e mesun nomber. Of su mama, cu ta e unico of un di e unico “Certified Investment Broker” nan di Aruba. Pero no, nan yiu a opta pa cana den e mesun caminda di e mama y awo ta orguyoso di a logra e trabou di su soño, anto na New York!
For di Colegio Arubano pa High School
Despues di a caba su VWO-3, Daniel Alexander Jacobs, na un edad hopi hoben, apenas 15 aña, a insisti pa kita for di Colegio Arubano pa bay Merca pa follow his dream. El a bay 3 aña di High School na Fort Lauderdale, y a combina eynan estudio y su pasion pa landamento competitivo. Su meta, cu 15 aña di edad tabata, pa traha duro pa nan reclut’e como un student athlete na un universidad renombra. Y su soño tabata mas grandi cu djis esey, tambe su deseo semper tabata pa despues di gradua, e lo por end up na New York den e ramo di “Investment Banking”.
A logra su soñonan un pa un
Su prome meta el a cumpli na aña 2018, ora el a gradua di High School y a cuminsa Georgia Tech como un student athlete. Durante su estudio e tabatin oportunidad di gana experiencia den sector di Private Equity y como e top 5% di su Finance Class tambe a maneha un portfolio di US $2 million di e Georgia Tech Student Foundation.
Gradua den gran forma
E luna aki, Daniel Jacobs a gradua cu summa cumme laude den “Finance” y cu un minor den “Economics”. E no a djis gradua, pero el a caba su scol cu un bunita CV di tur locual el a haci y logra tambe banda di su estudio.
Y e soño mes mes
Tabata algun dia pasa cu Daniel Jacobs, un hoben di apenas 22 aña di edad, a logra su ultimate dream, di haya un trabou den e ramo di Investment Banking, anto no unda cu ta, sino na New York! Na luna di juli proximo, Daniel ta cuminsa su carera na un banco di inversion na New York City, como un “Investment Bank Analyst” den e departamento di Merger & Acquisitions.
Sigui bo soño
E moral di e storia aki, separa cu Daniel Jacobs a studia bon y a haya un bon trabou, ta e echo cu el a soña cu e ruta aki den su estudio y su carera profesional. Masha poco hoben lo sali di Colegio Arubano na mita caminda asina, pasobra e lo mester a bay algun aña mas pa e caba VWO. Pero esey no tabata locual e tabata kier of desea. E kier a combina su pasion pa landamento hunto cu su estudio y na Merca esey ta mas facil. El a convence su mayornan cu e lo haci su best. Su mama y tata a kere den dje y a apoy’e den su soño y awe e lo cosecha e frutonan di su mesun soño, vision, pasion y logro.
Mayornan ta super orguyoso
Claro cu e tipo di logronan asina no ta solamente ta bisa algo di e studiante, pero tambe di e tipo di mayornan cu e tabatin na cas pa brind’e e guia necesario. Siendo tata y mama, a pone condicion cu tanten ta studia, por conta cu e ayudo incondicional. Daniel y Marion awe, na un edad hoben ainda, por tin un sonrisa di orguyo riba nan cara, pasobra a duna e miho di nan na e muchanan y e resultado ta bisto. E yiu mayo a slaag tres aña pasa na TU DELFT na Hulanda como ingeniero (ir.) den “Luchtvaart- en Ruimtevaart Techniek” y ta trahando na un compania grandi den e ramo di su estudio. E yiu muhe ta Doctor den “psychology” y ta biniendo Aruba pa lanta su propio praktijk. Y awo e ruman di mas chikito a gradua summa cum laude na G-TECH na Atlanta cu un mayor den “Finance” y un minor den “Economics”. Manera el a gradua y basa riba su CV, el a haya trabou mesora cu un banco di inversion na New York.
Tocante Georgia Tech
Georgia Institute of Technology, tambe conoci como Georgia Tech of, manera nan ta yam’e den e estado di Georgia, esta Tech, ta un universidad publico di investigacion y un instituto di tecnologia na Atlanta, na Georgia. E ta parti di e sistema di universidadnan di Georgia y tin campusnan na Francia, Irlanda, China y Singapore.
E scol na aña 2019 a conta mas cu 36 mil studiante, mas di 1700 personal academico y mas di 5000 empleado administrativo. E scol tin un presupuesto anual di mas cu dos biyon dollar Mericano.
A funda e scol na aña 1885 como Georgia School of Technology, siendo parti di e plan pa reconstrui e economia industrial despues e guera civil den Merca. Inicialmente, e tabata ofrece unicamente estudio como ingeniero mecanico. Pa aña 1901 a expande su curiculo incluyendo estudio pa bira ingeniero electrico, civil y kimico. Na aña 1948 a cambia nomber di e scol pa refleha su evolucion pa bira un instituto tecnico y como un universidad di investigacion.
Awendia Georgia Tech ta organisa den seis college y ta contene como 31 diferente unidad, cu enfasis riba ciencia y tecnologia. Nan ta bon reconoci pa su programanan educacional den ciencia di computer, ingeneria y negoshi. Studiante y atletico, ambos organisa internamente como parti di e bida di e alumno. E scol ta reconoci pa su ekiponan deportivo, specialmente su ekipo di futbol Mericano “Jellow Jackets” cu cuater biaha a gana e competencia nacional entre scolnan.
