E registro civil ta e base di e intercambio di informacion segun director di SVb. E registro civil ta locual cu ta haci e sistemanan automatico, cu ta compara y ta bisa cu ta persona por ehempel, ta bibando ainda, ta notifica SVb Hulanda, cu e persona ta na bida y bibando na Aruba. Ora bo tin un sistema cu no ta bon actualisa, bo no por haci esaki. Esey ta pone cu e calidad di bo informacion no ta bon. Edwin Jacobs a splica cu, na momento cu bo tin un registro civil actualisa, e calidad di informacion cu bo ta brinda ta subi y por lo tanto e confiabilidad di bo partnernan den bo informacion ta aumenta. Esey ta solamente fortifica bo posicion y e cooperacion den reino. Ta sumamente importante pa esaki, segun Jacobs.
Tambe ta cuminsa mira e fruta di e conexionnan cu ta cuminsa pone entre diferente archivonan den diferente departamento crucial. Di parti di SVb mes ta contento cu nan tin ya mas cu un aña acceso directo na e registro civil live. Por haci controlnan cu tin cu haci live. Registro civil a automatisa y a yega e nivel ey, cual ta hopi bon. Falta ainda un paso mas pa bay cu nan, cu ta e notificacion automatico di fayecimento y entrada y salida. Pero esey tambe ta den pipeline. Lo bay yega eynan.
Ta hopi satisfecho cu e servicio cu SVb ta ricibi di registro civil, pasobra ta un servicio cu nan ta duna. Mescos tambe nan ta hopi contento cu e servicio cu tin awendia cu ta adelanta riba e tereno di pensioen. Si antes, ora cu un persona entrega su peticion pa AOV, e momento ey ta manda su peticion na oficina di registro civil, e ora nan ta bay controla y hopi biaha e hende tabata yega su edad di pensioen y no por a dun’e pensioen, pasobra no a keda cla na bevolking cu e confirmacion di e dato di e persona. A yega asina leu den e relacion cu registro civil, cu awor aki ta wordo suministra prome cu e aña cuminsa, cu un lista di nomber di tur e personanan den e registro civil cu e aña siguiente ta bay bin na remarca pa pensioen. A base di esey, ta sacando un carta pa e aseguradonan cu ta bira pensionado adelanta, informa nan cu nan ta bay bin na remarca pa haya nan pensioen di biehes y na mes momento ta informa nan cu nan por haci uso di e sistema digital di SVb den comodidad di nan cas, pa haci nan peticion.
Tremendo e cooperacion aki cu SVb ta hayando di registro civil
SVb tin un intercambio di cooperacion cu Dimas. Nan ta intercambia e informacion aki caba, a base di intercamio di informacion eynan na 2016, ora cu a constata un grupo grandi di persona cu ta ricibi permiso di trabao di Dimas, no ta sigura na SVb, no tabata cumpli cu nan obligacionnan. E momento ey, parlamento a dicidi di duna SVb e autoridad pa impone multa. SVb ta hopi contento tambe cu e relacion di trabao aki cu Dimas, cu proximamente den cuadro di e vision 2020 lo profundisa y amplia. SVb lo ta drentando awor aki intercambio di informacion cu Imigracion/Warda nos Costa. Tin un acuerdo caba di intercambio di informacion cu Belasting, di cual proximamente lo bay ta concretisa e comparacion di lista di trahado cu nan tin cu ta paga Loonbelasting, AOV, AWW y e lista di trahado cu SVb tin cu ta paga seguro di malesa y accidente. Asina bo ta mira cu ora bo ta cuminsa con e archivonan di gobierno ta, como instancianan cu ta encarga cu cierto ehecusion di ley, bo por bay ehecuta e ley mas efectivo y eficasmente. Esey ta solamente na beneficio di bo pais, pasobra bo por mantene bo leynan.
Hopi biaha tabata tin e situacion caminda cu leynan tabata wordo traha, pero pa bo mantene e ley, loke ta yama na Hulandes, e handhaving, tabata tin su retonan cun’e, pa motibo cu e sistemanan na e momento ey no tabata asina bon conecta. Pero e red di e archivonan ey lo bay ta cera. Tambe SVb ta den cooperacion cu departamento di labor. Asina ey bo ta bay ta cera tur bo archivonan di informacion, di datonan ya sina ey cada un departamento ta bay mira cu nan por ehecuta nan leynan mas eficas y eficientemente.
