Lider di UPP, Booshi Wever, ta hopi preocupa cu desaroyonan pa loke ta personal pa e rehabilitacion di refineria Citgo. Tin informacionnan hopi clave cu e ta hayando for di esnan cu ta hopi yega na e refineria.
For di siman pasa caba ora cu el a mira cu minister di labor y sr. Patrick Farro a sali for di un reunion cu dirigentenan di Citgo, unda cu nan a expresa enfaticamente cu cierto companianan, cierto contratistanan no mag di traha. Kisas, ora bo tende esey, ta bon noticia pasobra bo sa kico tabata pasa den henter e asunto di Citgo. Miyones di placa a disparce sin hende a wak e resultado den e planta mes. Awo mes bo ta ripara cu ta e mesun modus operandi. Solamente a cambia e companianan. Awo el a bira pio. E Oil & Gas Industry Desk antes Citgodesk, a cuminsa fungi como uitzendbureau.
Pakico
Wever a mustra riba un publicacion di DPL, na unda cu nanta pidi pa hende bin solicita, pa cierto contratistanan. Den e reunionnan cu nan tabata tin cu Citgo, ta bin bisa cu e unico compania cu mag di hire hende y diripente GTS a bin cu un hala di personal, cu nan mester hire. Ta e hendenan ey Citgo tin cu hire. Esaki ta algo alarmante, segun Wever. Un di e companianan cu rason kier core cu PMac, cual ta esun cu tabata wordo faboreci door di e intocablenan di RdA, awo a cambie cu GTS ta wordo preferi, lagando un banda companianan di contratista cu tin hopi aña ta trahando caba. Hendenan cu ta for di tempo di Lago tabata trahando como contratista, ta wordo poni un banda. Of GTS ta tuma hende den servicio y pasa poco trabao pa e contratistanan como subcontractor. Esaki no ta e modo cu un gobierno tin cu actua. Gobierno tin un tarea pa sali na vanguardia di pueblo di Aruba.
Locual cu ta wordo inverti den e refineria, pueblo, al final, ta esun cu tin cu bay paga pe si cos bay malo. Esaki no ta e manera cu mester bay. Si wak den campaña Glenbert Croes tabata bisti un pechi di San Nicolas. Pero kico a pasa na San Nicolas.
Por mira cuanto luga tabata cera y ta cerando. RBC ta bay cera. Ta grita cu ta bay sali na vanguardia di yiu di tera, di e Arubiano, kico a pasa cu Raymond Buckley. Dicon ningun hende no a sali na su vanguardia.
Kisas e por tabata un struikelblok pa e negoshi por a sigui, mirando cu ta hopi miyones tabata core.
Ora cu ta tende cu e partner in crime, Herbert Mensch, cu a wordo cori, cu ta un tipo di persona non-grata riba su propio isla, Corsou, ta bin traha na Aruba, cu un salario barbaro. Ta papia aki di 50 mil florin pa luna. Un trabao cu tin hopi Arubiano cu por haci e trabao aki. E ta algo inaceptabel cu un gobierno cu tin pretencion cu nan ta pro yiu di tera y mira kico nan ta haciendo cu nos propio yiunan di tera.
Manera prome minister a bisa, cu no kita for di trabao, pasobra e trabao ta temporario. No por confia 100% den Citgo. Awo, pa ken e aviso a sali. Pa yiunan di tera of pa stranhero atrobe? Pesey nan a pone esaki. Esaki ta pa stranhero bin den planta pa traha atrobe. Segun Wever, mester wordo denuncia. E ta enfatico, pasobra parce cu hende ta guli manda abao. Parce cu cos ta normal cu un parti di gobierno ta bay fungi como uitzendbureau.
Con por frena
Ta papia di un GTS, pero ken ta GTS? Segun Wever, tin un tal Ortega, cu ta un Venezolano biba na Merca cu ta un super bon amigo di director di RdA. Prome cu el a bin Aruba, e tabata haci trabaonan na Corsou y tur hende sa kico a pasa na Corsou. Ningun hende no a puntra kico a pasa na Corsou. Herbert Mensch a wordo kita for di Refineria di Korsou. Awo ta Herbert Mensch ta bay yuda e intocable di RdA. A bira tempo pa pueblo di Aruba wak e cosnan aki. Ta hopi placa nos pueblo ta paga. Pueblo ta parando garantia pa e cos aki. Ta hopi placa ta wordo hinca den RdA. A bira tempo pa pueblo di Aruba ta, unda su placa ta bay, unda cu e ta para garantia. Si mañan Citgo no bin, Citgo por bin cu un demanda cu Pueblo tin cu paga. Hopi hende ta papia y no kier bin dilanti. Wever si a bisa cu e no lo keda keto pa nada mas.
E ta tene su curason pa Aruba y vooral, pa San Nicolas.
