Na e momentonan aki ta existi e percepcion cu tin hopi hende fayeciendo. Principalmente den e categoria di hende grandi. Aunke cu e no tin e cifranan na su disposicion mesora, e director di AZV si por a bisa cu no ta limitando cuido medico.
Ir. Edwin Jacobs dialuna mainta tabata den un conferencia di prensa cual e tema principal tabata Cuenta Anual 2023 entrega recientemente na Minister di Salud Publico.
Asina el a pone su pechi di director di SVb (Sociale Verzekeringsbank Aruba) pa conta cu recientemente el a pidi un analisis di ultimo dies añanan riba e cantidad di pensionadonan, si tin “overtsterfte”. Loke el a enfatisa riba dje ta cu AZV no ta limitando cuido.
Ta vigila den forma regular e situacion. Cada dos luna ta consulta cu e dunado di cuido pa mira unda tin lista di espera. Si esaki ta demasiado, nan lo mester interveni. Ta normal cu tin tempo di espera y e mester ta algo aceptabel.
Asina den 2023 a bin constata cu den e sector di Urologia tin un lista di espera cu no ta aceptabel. Despues cu a tuma nota cu esaki no ta algo ocasional, a dicidi di inverti den e area. E mesun cos ta conta pa Oftamologia. A subi e presupuesto aki pa ImSan pa baha e tempo di espera cu e pashentnan mester pasa aden.
“Di nos banda no ta restringiendo cuido. Si tin bottleneck den e proceso di cuido, nos ta yuda pa alivia y soluciona e problema aki. Pero cu nos te restringi e cuido.”
