Por a ripara cu Aduana a gara mercancia ilegal y remedi scondi. Edward Maduro, presidente di sindicato SADA, a splica cu ta cos cu a yega señala den pasado como sindicato. Pa basta aña atras, Duana a dicidi di bay den direccion di menos control fisico y uza un sistema cu tin carga of producto cu ta saca cu documento cu ta ‘groen’. Den un manera di bisa ‘groen’ ta OK.
Ora cu ta bin cu un sistema asina pa trabao, mester tin herment pa vang op e parti cu ta bay duna e OK sin control fisico. Esey ta un di e ‘mankement’ grandi cu nan tin den Cuerpo di Aduana.
Sindicato SADA constantemente ta trece esaki dilanti na conocemento di e director, Ricky Croes. Tin un periodo basta largo cu no a sinta cu e minister di finansa. Pero ta bay sinta cu ne pronto. Pa otro siman lo tin un reunion cu ne y ta bay trece e echo aki dilanti. Ta obvio cu ta hopi importante pa tin e hermentnan na nan luga. Si no tin nan, e cuerpo no por funciona 100%.
E HERMENTNAN
Entre otro mester di un containerscan, cu ta un scan caminda cu ta pasa e container completo bao dje, caminda por mira kico por tin den dje mas o menos. Tabatin uno cu a cumpra na 2008 como segunda mano. E tempo ey na balor di 9 miyon florin p’e containerscan aki. Loke ta sosode, na 2009, e containerscan aki no a funciona casi mes. Tabatin un momento cu un truck a reverse, a dal e y a kibr’e. Tabatin un disputa ken lo a dreche. Despues di esey el a keda un tempo sin funciona warda den loods.
E sindicalista a sigui splica cu a bay pa drecha e scanner, pero ora un cos tin asina tanto tempo para e no ta funciona mas.
Maduro ta sigui bisa cu door cu tin un sistema nobo cu no tur container ta controla fisicamente. E ta haya e documento ‘groen’ y unabes e sali fo’i waf, e ta bay n’e broker of n’e doño di e container y ta bah’e y no tin ningun tipo di control.
Tin hopi cos tra’i cortina cu ta analisa tambe. Pero hopi biaha mester tin e hermentnan ey na nan luga. Un containerscan mes, no ta ni na Aruba mas, ya cu a bende na un prijs ridiculamente abao. “Nan a casi regal’e ya cu e no tabata funciona.” Esey ta algo cu semper a bisa, cu nan mester di tools.
