A scucha lider di MEP cuestiona integridad di tur su oponentenan politico. Esun di su candidatonan di MEP si e ta purba sconde. Nos a confirma cu e candidato Edmond Paris #22 di MEP, miho conoci como Eddy, cu mester duna cuenta na husticia di Aruba.
Tur cos ta indica cu Edmond “Eddy” Paris a ser informa cu asina cu e yega Aruba e mester atende cu husticia. Probablemente lider di MEP sa of e mes kisas a inform’e. Den mesun rosea lo a bisa e representante di e gabinete Wever-Croes pa keda Europa.
Imaginabo un candidato number 22 riba lista di MEP cu no a duna cara pa campaña. E no a bin Aruba mes pasobra e tin miedo di loke ta sper’e asina e baha di avion. Edmond Paris tin cu atende cu un asunto penal pasobra ta autoridad mester di dje.
E candidato aki na aña 2017 a haya 140 voto cu un campaña pisa. Na 2021 el a bay cu mesun #22 riba lista y a haya 28 voto sin cu e tabata na Aruba. Ultimo biaha cu el a bin Aruba tabata na april. El a keda como cuater siman y djey a bay. E intencion tabata pa bolbe. Asina cu e lo a tende kico por sper’e na Aruba, el a dicidi miho keda na Europa.
Eddy Paris ta atende asuntonan relaciona cu Union Europeo pa Aruba. E ta un diplomatico. No sa si den e gobernacion nobo e lo sigui cu e funcion. Su famia mes a sali pa Hulanda pa asina e yiunan por mir’e den e vakantie aki. E tata no kier core e risico di bin y hay’e cu un yegada desagradabel.
Nos no ta imagina cu lider di MEP, formado di e gabinete y minister- president demisionario no ta na altura cu husticia ta buscando un ehecutivo di su gabinete. Ta keda pendiente pa mira kico ta bay sosode y si un dia e bolbe, con autoridad lo atende cu ne na su yegada.
E ultimo trabou cu Eddy Paris tabatin na Aruba prome cu el a bira diplomatico di Gabinete Wever-Croes na Belgica tabata na Banco di Caribe. Ey el a bay na malo, debi na practicanan interno den cual el a beneficia su mesun negoshi, trahando na e banco. No ta conoci si e banco a entrega un keho penal contra dje.
