Edificio di Uncle Louis Store na San Nicolas tabata un di e cuater ganadonan di e premio Pieter van Vollenhoven.
Mircla Nava, Relacionista Publico di Stichting Monumentenfonds a cuminsa na bisa cu nan ta masha contento cu nan a ricibi e prijs aki, hunto cu Directie Natuur & Milieu. A dedica e premio aki na tur e islanan cu ta traha hunto pa salvaguardia e herencia cultural di e islanan.
Riba 22 di april 2022 cuater organisacion cu a tuma e iniciativa pa restaura y redestina un monumento a ricibi e Pieter van Vollenhovenprijs. E Volmolen na Amersfoort, Fifth na Eindhoven, Fort van Hoofddorp y Uncle Louis Store na San Nicolas (Aruba) a haya e herbestemmingsprijs pa e manera con nan a duna un bida nobo na e monumentonan aki. Den e Fort van Hoofddorp e ex-presidente di Nationaal Restauratiefonds prof.mr.Pieter van Vollenhoven a entrega e premionan personalmente.
Tabata net un luna pasa cu e islanan di Reino Hulandes a bini hunto na Boneiro pa un congreso, unda cu a firma un intencion pa sigui traha hunto riba compartimento di conocemento. Ta prome biaha c’un isla (pafo di Hulanda) ta gana e premio aki. Semper tabata e proyectonan na Hulanda cu a gana esaki y sigur ta contento cu Aruba tabata e prome cu a gana esaki.
Pero loke a haci e edificio aki special, ta cu e ta e prome monumento cu ta uza panel solar y un sistema di reciclahe di awa, cual ta hacie un edificio monumental sostenibel.
Crea un funcion nobo pa un monumento mayoria biaha no ta un tarea facil. Cu e premio, cu ta ser otorga pa un hurado independiente forma pa specialistanan den patrimonio, prof.mr.Pieter van Vollenhoven kier expresa su gran aprecio pa e iniciadonan. “E perseverancia de e cuatro iniciadonan durante e redestinacion di nan monumento ta admirabel. Nan tur ta ehempelnan exitoso. Danki na nan y tur esunnan involucra cu pasion pa herencia cultural, nos monumentonan den Reino por keda preserva”.
E premio a keda entrega pa prome biaha na 2014. Cada aña ta pone un suma di € 10.000, – disponibel, e suma aki lo keda reparti entre e cuater ganadonan.
E ganadonan
Volmolen Amersfoort
E Volmolen na Amersfoort a yega di tin diferente funcion caba. E ta construi na 1645 pa e industria textiel. Despues di esey e tabata un luga di carpinteria, cas di artista y un weefatelier y desde 2020 tin un imprenta di catuna den e Volmolen. Cu e redestinacion aki tanto herencia material como inmaterial ta encontra otro na un manera unico den un monumento cu ta accesibel atrobe pa publico. E prome imprenta di catuna di Europa a keda estableci na Amersfoort na 1678. E persona cu a tuma e iniciativa tabata Nathalie Cassee, prome e la haci un investigacion bibliografico y di archivo pa un aña largo tocante historia di imprenta di catuna na Amersfoort y despues a habri De Katoendrukkerij. E volmolen ta forma hunto cu e Koppelpoort ta forma e logotipo iconico di Amersfoort cu lo permanece bibo cu e funcion nobo aki.
Fort van Hoofddorp
E Fort di hoofddorp di 1904 ta forma parti di e Linea di Defensa di Amsterdam. E Fort nunca tabata structuralmente accesibel pa publico y tabata tin un mantencion atrasa severo. Cu e redestinacion realisa pa e productor di teatro Femme Hammer y arkitecto Serge Schoemaker, e fort a bira un luga habri atrobe. E forteiland awor a keda comberti den un parke di ciudad cu espacio pa horeca y diferente actividadnan cultural y educativo. Ariba di e isla tin un teatro na aire liber. Durante dies aña largo Hammer y Schoemaker a traha incansablemente pa crea un funcion nobo pa e Fort. Nan a logra supera varios obstaculo durante e tempo aki. E plan a haya apoyo financiero di e Provincia Noord-Holland, Gemeente Haarlemmermeer y diferente fondonan cultural. Tambe nan a obtene un prestamo for di Restauratiefonds.
Uncle Louis Store na San Nicolas (Aruba)
E aña aki ta prome biaha cu un monumento den e parti Caribense di nos Reino ta ricibi e Pieter van Vollenhovenprijs. E monumento di Uncle Louis Store na San Nicolas na Aruba ta construi manera un tienda y cas. Despues di e restauracion haci pa Stichting Monumentenfonds Aruba (SMFA) e la bira un di e oficinanan mas sostenibel na Aruba. E monumento tabata pa hopi aña bashi despues di su ultimo funcion manera oficina di Aduana. E edificio tabata den un mal estado caba ora SMFA a cumpr’e. Sin e iniciativa aki e edificio lo a sigui deteriora cu e posibilidad cu lo mester a bash’e abou. Lamentablemente esaki ta e destino di varios monumento na Aruba. Despues di e compra di e edificio SMFA a encontra bastante reto, entre otro pa yega na un huurdo pa e edificio. Durante e restauracion a topa cu varios ‘sorpresa’ pero na final tur cos a bay bon. E habitantenan bieu di San Nicolas tabata contento cu e resultado.
Fifth / NRE in Eindhoven
Hein Stiphout a duna un bida nobo na e fabrica di gas di aña 1901 na Eindhoven.
Awor e ta un club di jazz cu restaurant, un sala cu podium, un stadsbar separa y un koffiebranderij bou di e nomber: Fifth| NRE. Danki na e restauracion, e fabrica di gas, cu tabata core peliger di basha den otro te cu un parti no tabata tin mag di wordo uza mas, awor lo ta preserva pa futuro. E proceso a dura casi dies aña debi na e ‘ruimtelijke ordeningsprocedure’. A conserva e interior y exterior mas tanto posibel den su forma original di manera cu mas di cien aña di herencia industrial a keda conserva cu mira riba sostenibilidad. Cu e restauracion di e monumento aki tambe a amplia e oferta cultural di Eindhoven cu un escenario pa musica specificamente di blues y jazz.
PIETER VAN VOLLENHOVENPRIJS
Ta otorga esaki for di 2013, un regalo haci na mr. Pieter van Vollenhoven di Nationale Restauratiefonds. Pa 27 aña largo, e tabata presidente di e fundacion y na momento di su despedida, a dicidi cu tur aña ta duna un proyecto un premio na su honor. Den su añanan como presidente mr. Van Vollenhoven a para fuerte pa esunnan cu tuma e iniciativa propio pa preserva un monumento. Pa mantene e pensamento aki bibo a institui e premio pa asina stimula un y tur cu kier tuma e iniciativa pa restaura y duna un funcion nobo na un monumento.
Pero pa esaki lo mester cumpli cu algun criterio y esakinan ta cu e por ta un particular of un organisacion. Importante ta cu a tuma e reto pa restaura un monumento pa dun’e un funcion nobo, cual ta hopi importante. Pa mantene e pensamento aki bibo a institui e premio pa asina stimula un y tur cu kier tuma e iniciativa pa restaura y duna un funcion nobo na un monumento.
E mester ta un edificio monumental, e no mester ta un monumento pero si e mester ta un restauracion sostenibel. Banda di esaki e mester ta accesibel tambe pa publico.
