Diahuebs mainta tabatin un reunion den parlamento caminda cu a invita prome minister Evelyn Wever-Croes pa haya mas splicacion riba e proceso di screening.
Durante e introduccion di presidente di parlamento, mr. Edgard Vrolijk, parlamentario di fraccion di AVP, Arthur Dowers a indica cu nan a manda un carta caminda e tres fraccionnan den oposicion a pidi un reunion publico, pero no tabatin quorum.
El a pidi presidente di parlamento pa e fraccionnan presente pa considera e hecho aki. Vrolijk a indica cu diaranson atardi laat oposicion a mand’un carta cu peticion pa cambia e OB (Openbare Bijeenkomst) pa un OV (Openbare Vergadering – Reunion Publico).
E ta un herment cu tin y tur parlamentario ta haci uzo di nan. A base di e pregunta haci pa Dowers cu a trece dilanti, a puntra lider di fraccion di MEP, Shailiny Tromp-Lee y Misha Raymond di Raiz si por cambia OB pa un OV, caminda cu ambos a expresa di no ta bay di acuerdo.
Aki a sigui un bay bin di palabra caminda cu e Vrolijk a manda Dowers sinta, sino e lo tin cu bandona sala di parlamento.
Asina mes mientras cu e prome minister a cuminsa na bin cu su palabranan di introduccion, parlamentario Dowers tabata interumpi, treciendo su punto dilanti.
Por a nota claramente cu e presidente di parlamento a habri riba e parlamentario y a acus’e di ta kibra autoridad di cierto parlamentarionan pa bin cu un OB.
“Aki nos tin ordo. Si den bo cas bo no gusta ordo, aki den si,” ta loke cu Vrolijk a contesta.
Despues di un rato parlamentario Arthur Dowers a bandona sala di parlamento.
Pa cobertura mas amplio lesa edicion di TREMPAN mañan.