Awe marduga pa mas o menos 1:28 am a tira un hoben di 17 aña di edad dilanti un cas situa den Mandolinstraat na Dakota. Parce cu un auto marca KIA modelo Rio color shinishi lo mester a para dilanti e cas na Mandolinstraat y a los un tiro, cu a alcansa e hoben cu tabata pafo di e cas.
Aparentemente no tin testigo of por lo menos na e sitio niun hende a mira e number di auto of sa ken e persona cu a tira ta. Tampoco por a haya un descripcion pa por yega facil na esun cu a tira. Como tal, no tin un idea dicon a tira e hoben aki y cu ki intencion.
Ambulance a presenta na e sitio y a brinda asistencia medico na e victima. A transport’e cu maximo urgencia pa hospital. E situacion di e victima ta “critico stabiel”, segun polis.
Patruyanan riba caya a cuminsa cu e buskeda pa e auto encuestion, pero no a topa cu nada. Cuerpo Policial ta pidi esun cu a mira algo of sa algo pa yama e tiplijn di polis na 11141. Bo anonimidad ta garantisa!
