Den e dianan aki por nota trabounan di construccion tumando luga dilanti di Embassy Suites, situa na Eagle Beach, schuin tegenover di Divi Phoenix. E trabounan ta encera un tunnel cu lo coba pa nan huespednan por crusa bay lama, sin cu nan mester crusa caminda y core risico den trafico. Mientrastanto e caminda eybanda ta cera, pa e trabounan por tuma luga. Ta trata aki di un inversion cuantioso, cu Embassy Suites mes ta cubri completamente.
Director di DOW, ing. Marlon Croes a splica cu e proyecto Embassy Suites den area di Irausquin Boulevard na Palm Beach, ta encera un hotel grandi cu hopi camber y den transcurso di e ultimo añanan aki diferente peticion tabata bay bin riba con pa garantisa siguridad di peatonnan cu tin di crusa for di nan compleho pa bay lama. Den cuadro di e situacion ey tabatin basta discucion unda a presenta diferente alternativa.
Entre otro verkeers plateau, brug cu tin cu pasa riba e caminda, un tunnel pa pasa bou di e caminda y den nan a evalua e diferente aspectonan. Como Embassy Suites cu nan corporate governance a bisa cu nan, mirando cu ta dilanti nan hotel y tin cu garantisa siguridad di nan huespednan, a opta pa coba un tunnel. Di parti Gobierno a evalu’e y a purba di convence nan pa no haci esey y bay den otro direccion. Pero asina mes nan a para riba cu esey ta e solucion cu nan kier, aunke e ta costa mas cu e otro opcionnan. Embassy Suites ta carga tur e gastonan pa e contruccion di e tunnel aki. Un gasto substancial.
Den e proceso, Ministerio di Infrastructura (Otmar Oduber) a tuma e desicion y a duna permiso pa e construccion. Den transcurso di aña pasa (mita aña den luna di juni) a otorga e permiso, despues cu a acorda e condicionnan. Den e caso aki Embassy Suites ta responsabel pa e diseño, construccion, mantencion y responsabel pa financiamento di construccion di e tunnel. Banda di esey tin otro dos aspecto cu ta hunga un rol ora ta traha un tunnel, cu ta control social pa e no bira un “Black Spot” den nos turismo.
Ta mira e factor di atraco cu por tuma luga. Mester tene cuenta tambe cu ora di calamidad, manera entre otro horcan cu lama ta cambia na momento cu biento bolter y ta crea olanan grandi den e area aki. Ta riesgonan cu nan a absorbe por completo incluyendo gastonan si acaso e sufri cualkier daño. Nan lo manten’e , oper’e y cuid’e pa garantisa siguridad di nan huespednan y tur peaton cu ta haci uzo di dje. Un tunnel pa peaton, te caminda cu por corda, no ta algo cu nos pais nunca a conoce.
For di Embassy Suites lo por cana sin ningun obstaculo door di e tunnel y asina yega na e area di beach cu lo pasa for di bista di esunnan cu ta move den e area. Un otro punto menciona pakico a opta pa e tunnel ta e bista, mirando cu un brug lo daña e ocean view como tambe di experiencia por bisa, manera esun di Pos Chikito, cu no ta uza manera premira.
No a sinti cu tin obhecion di parti di e bisiñanan den area. Pa locual ta medio ambiente a tene cuenta cu e mangrovenan, no mag corta mangrove mirando cu nan ta protegi y tin cu cuida nan durante e proceso. Den e acuerdo tambe ta encera e caminda cu ta pasa riba e tunnel cu ta acuerdo cu a yega entre concesionario di Watty Vos Boulevard y Embassy Suites y Gobierno di Aruba.
