Dialuna ultimo e apertura oficial di Global Money Week Aruba a tuma lugar na Museum of Industry na San Nicolas.
Pa un siman largo, mas o menos 700 mucha di diferente scolnan lo participa na e evento aki, unda nan lo siña na un manera interactivo over di diferente areanan di placa: con pa traha placa, con pa spaar placa, con pa uza placa na un manera responsabel y con pa duna bek na comunidad.
Global Money Week (GMW) ta un evento educacional cu ta tuma lugar mundialmente cada aña na maart. Pa fomenta educacion financiero na Aruba, Banco Central di Aruba (BCA) hunto cu Kids Council Aruba y socionan manera Gobierno di Aruba ( IDEA & FUTURA), Aruba Bank, Banco di Caribe, Caribbean Mercantile Bank, CIBC First Caribbean, RBC, Guardian Group, Qredits y Kiwanis Club of Aruba, a dicidi di lansa un edicion di GMW na Aruba.
Diferente scolnan basico lo sigui un ruta door di San Nicolas, den un forma di un speurtocht, y bishita e 6 stacionnan, esta Learn, Earn, Save, Spend, Share y Innovate. Na final di e ruta e muchanan lo ricibi nan “tesoro”, y lo a siña varios lesnan importante di placa y tambe di reciclahe.
“E necesidad di educacion financiero ta uno grandi na Aruba. Pa e motibo ey e ta hopi importante cu muchanan for di un edad jong caba ta siña con pa traha placa, pa planea gastonan y pa siña e balor di spaar pa asina realisa nan metanan finaciero” asina Presidente di BCA, Jane Semeleer, ta comenta.
Un cantidad grandi di sponsors manera Do it Center Aruba, Manrique Capriles, Subway, Aruba Art Fair, Santa Rosa, Mundi Health Café, JDB Agency, FMA, Safecom, Frasa, Serlimar y colaboradonan manera Arubus, KPA, DOW, Rode Kruis, IBISA, EPI, Scouting Aruba y studiantenan di UA y Colegio San Nicolas a yuda realisa e prome evento aki.
