Den e vuelo di awe mainta tabatin 134 pasahero den e di dos vuelo humanitario. Un grupo tabata na Guarda Nos Costa (GNC), pero mayoria tabata personanan cu a presenta boluntariamente na DIMAS y Consulado di Venezuela pidiendo pa nan por regresa nan pais.
Richard Kramers, director di Guarda Nos Costa, a enfatisa cu esaki tabata e di dos vuelo. A tene e prome vuelo den e prome siman di september. Nan a haya peticion caba pa mas vuelo, pero door di tin mas demanda ta trahando duro riba un di tres vuelo. No por duna un fecha ainda, pasobra mester discuti esey ainda.
Di cuanto hende tin pendiente ainda cu mester bay bek, Kramers no por a contesta, pero e sa di esunnan cu ta cera cerca nan y otronan cu falta pa expulsa. Pero pa haya cifra, esey ta DIMAS y Consulado di Venezuela por bisa. Segun Kramers, Guarda Nos Costa tin un tremendo cooperacion cu DIMAS, Consulado Venezolano, Directie luchtvaart, Buitenlandse Betrekking, CEA y IASA (Migracion). Hunto cu partnernan ta traha riba e vuelonan humanitario. Esunnan cu ta regresa nan pais boluntariamente ta cubri nan mesun pasashi.
Na Guarda Nos Costa tin mas hende cu no ta di nacionalidad Venezolano, pero ta en espera di otro vuelonan habri. E grupo di otro nacionalidad no ta mes grandi manera e grupo di Venezuela, pero tin algun persona en espera di nan deportacion. Awo cu tin espacio atrobe na Guarda Nos Costa, e posibilidad ta existi cu nan ta tene accion riba caya. Nan ta monitor con lo sigui p’e di tres of otro vuelonan prome cu tuma decision di cuminsa accion rigoroso contra ilegalnan na Aruba.
