E aña aki ta tuma luga e di 19 Tiger Taekwondo Open International Championship, unda cu atletanan di taekwondo di diferente pais lo competi. Atletanan di Aruba tambe lo ta competiendo, unda cu lo busca pa mantene e titulonan na cas.
Fundacion Lotto pa Deporte ta orguyoso di por patrocina e campeonato aki. Aruba lo ta competiendo contra otro 13 pais manera Merca, Venezuela, Boneiro, Corsou, Argentina Cuba, Mexico y hopi mas. St. Tiger Taekwondo a bishita Fundacion Lotto pa Deporte, unda cu Master Theo Rodriguez a papia cu president di e fundacion, Di-Stefano Wernet riba e competencia cu lo tuma luga na Mei 2018. Despues di a scucha tur e logronan di e torneo aki, Fundacion Lotto pa Deporte a bay di acuerdo pa yuda patrocina e campeonato aki. E campeonato lo tuma luga dia 26 di Mei 2018 cuminsando pa 9:00am na Centro Deportivo Libertador Betico Croes. Entrada lo ta 5 florin pa mucha di 6 aña bay ariba y 10 florin pa adulto. Fundacion Lotto pa Deporte ta invita tur hende pa bin apoya e atletanan di Aruba.
