Cu iniciativa di un grupo di enfoke di hoben local, den combinacion cu e team di produccion di e programa Vota pa Ken? y e team di Xclusivo Magazine, lo organisa E DEBATE. E debate aki lo tuma lugar diaranson dia 9 di juni pa 7’or di anochi na Renaissance Convention Center.
E DEBATE lo ta ‘hybrid’, unda cu lo tin un publico limita presente den sala y pueblo completo lo por sigui esaki via red social, manera entre otro e pagina di facebook di Vota Pa Ken?, Debate Virtual Xclusivo y tambe otro medio local cu lo join e transmision for di 7’or di anochi. Algun di e topiconan cu lo enfoca riba dje ta: salubridad, educacion, problema social y husticia.
Un total di 10 partido a confirma nan participacion na e debate aki. Locual lo duna un toke unico na e debate aki ta cu no ta solamente e lider di partido lo debati, pero tambe un representante Millenial. Esunnan cu a confirma nan presencia ta ACCION 21 (Miguel Mansur y Christian Soto Garcia), AVP (Mike Eman y Gerlien Croes), CURPA (Eric Ras y Ashan Tromp), HTC (Gilbert Webb y Michelangelo Celestijn), MEP (Evelyn Wever Croes y Rocco Tjon), POR (Alan Howell y Patrick Kock), PPA (Lisette Malmberg y Joseandro Chiquito), RAIZ (Ursell Arends y Misha Raymond), RED (Ricardo Croes y Kinsasha van der Bliek) y UPP (Seraida Pemberton-Leonard y Yahaira Kuiperi).
E moderadornan pa e anochi aki lo ta den man di un team hopi balansa. Ta trata aki di e presentadornan di e programa Vota Pa Ken?, esta Samil Susebeek, Mauro Caralps y Sharkk Gario cu lo modera e parti cu e representantenan Millennial y Jaqueline Wernet hunto cu Atan Lee Jr., e presentadornan di e programa Debate Virtual Xclusivo, lo modera e parti cu e lidernan di partido.
E ekipo organisador, cual ta consisti di diferente ‘young entrepreneurs’ den diferente ramo, a formula e pregunta- y ponencianan basa riba, entre otro: decision di corte, rapport di, entre otro, SER, Crisisplan, Landspakket, Plan di Educacion Nacional y precupacion di nos comunidad vocifera tanto den medio local como social cu lo percura pa un debate na nivel y cu contenido. Tambe mester menciona cu e grupo di organisador a organisa un debate similar cu hopi exito durante e eleccion anterior. Esaki a tuma lugar den Cas di Cultura.
Pa locual ta produccion, esaki lo ta den man di Elite Productions & Entertainment y Elite Studios.
Pa e publico den sala ta hopi importante pa mantene nan mes na e reglanan principal cual ta, entre otro: material di campaña y pa haci desordo ta prohibi y cu tanto e publico como e candidatonan mester mantene respet pa otro.
Danki na Setar N.V., Subway, Crest, Elite Productions & Entertainment pa nan aporte pa haci e debate aki posibel.
Unda por mira E DEBATE:
https://www.facebook.com/votapaken y https://www.facebook.com/xclusivomagazine
