Departamento di Salud Publico pa medio di su encuestadornan di STEPS a bin ta nota precupacion cerca algun adulto mayor durante nan bishita n’e diferente cas rond Aruba. E pregunta cu frecuentemente cu ta haci ta; dicon e adulto mayor di 69 aña no ta participando na STEPS? Pa por yega na e contesta aki ta importante pa splica e meta principal pakico ta haci e investigacion nacional STEPS.
E meta principal di STEPS ta pa detecta factor, conducta of custumber cu ta conduciendo cu na un edad relativamente hoben nos comunidad ta desaroyando diferente malesa cronico manera diabetes, obesidad, cancer y otro malesa cronico cu antes tabata considera como “ouderdomziekten”, esta malesa cu na edad halto riba 69 aña tabata presenta.
Den e mundo medico ta normal cu un persona riba 69 aña debi na su edad ta desaroya cierto malesa cronico, locual no ta normal ta e aumento drastico di malesanan cronico cuminsando for di edad hoben na Aruba y otro pais pa cual motibo ta importante pa investiga esaki pa medio di STEPS y traha na plan y maneho di prevencion mas dirigi riba e factornan.
Splicando esaki, Departamento di Salud Publico ta spera cu comunidad por compronde awo e meta preventivo patras di STEPS y tambe cu STEPS no ta un chekeo medico na cas. Tambe ta importante pa señala cu STEPS ta un programa di investigacion di e Organisacion di Salud Mundial (WHO) y tur parti mundo e investigacion aki ta eherce di e mesun forma y bou di e mesun criterianan. Dus no ta asina cu Aruba ta dicidi bou cua grupo di edad esaki mester haci. STEPS
Aruba 2023 ta sigui te cu luna di juni y e meta ta pa logra haci encuesta di 5120 cas. Ta pidi na comunidad pa si acerca bo, no duda pero participa.
Pa mas informacion like nos Facebook page Directie Volksgezondheid DVG Aruba, Follow nan riba Instagram directie_volksgezondheid_aruba, subi nan website www.dvg.aw, yama na 5224200 of manda un e-mail na [email protected]
