Campaña anual di vacunacion contra Influenza ta bay cuminsa y Departamento di Salud Publico (DVG) ta haci un yamada na e grupo di risico pa pasa busca nan vacuna completamente gratis na un di e localidadnan cu mas ta combiniente.
Bou di grupo di riesgo DVG ta referi na personanan cu ta na risico pa desaroya complicacionan grave manera bronkitis y pulmonia pa motibo di griep. E personanan aki ta hende grandi riba 60 aña, mucha bou di 2 aña, personanan cu ta sufri di enfermedadnan cronico of enfermedad di nan sistema respiratorio. Tambe personanan obeso, na estado of cu tin un sistema inmunologico abou door di enfermedadnan manera cancer y HIV.
Aki bou ta sigui un lista di e diferente dia y localidadnan unda nos enfermeronan lo bay ta aplicando e vacuna di influenza.
Diahuebs dia 22 y 29 di october na Centro Playa Pabou entre 9:00AM y 12:00PM;
Diabierna dia 23 y 30 di october na Centro Curazon Santa Cruz entre 9:00AM y 12:00PM;
Diamars dia 27 di october y 3 di november na Centro di Bario Noord entre 9:00AM y 12:00PM;
Dialuna 2 y 9 di november na Centro di Bario Brazil entre 9:00AM y 12:00PM.
Na e localidadnan aki lo vacuna personanan cu ta cay bou di e grupo di riesgo. E personanan aki mester presenta cu nan recept di doctor di cas y nan carnet di AZV. Adultonan mayor di 60 aña mester presenta solamente cu nan carnet di AZV valido. Esnan cu no ta cay bou grupo di risico pero kier cumpra e vacuna, esaki no ta posible na e postnan menciona ariba, pero si na seccion di Malesanan Infeccioso. Es cu kier cumpra vacuna mester haci un cita online via www.dvg.aw. Riba e website lo encontra un link pa por traha un cita pa campaña di vacunacion contra influenza.
Pa esnan cu enberdad no por traha e cita online por haci esaki tambe telefonicamenta via 5224239 of 522424 nos ta informa si cu nos lineanan ta basta ocupa relaciona cu e maneho di e crisis di covid-19. E vacuna tin un costo di fl 20,- y por paga unicamente electronico (swip), no ta permiti placa cash.
