Un grupo grandi di comerciantenan a asisti diaranson 30 di juni na e prome Businesss Networking Event organisa pa Comerciantenan Uni Aruba (CUA). E encuentro a tuma luga den oranan di atardi pa anochi na e espacio paden y pafo di Harbour House, den centro di Playa. Esunnan presente a expresa di a keda masha satisfecho cu loke a mira y scucha; tanto for di e directiva di CUA, como tambe di e orador invita. Fuera di sinti cu e gremio lo tin un bon representacion di nan interesnan, tambe por a conoce detayenan interesante di e proyecto Gateway 2030 di AAA N.V. y papia cu otro comerciantenan.
A hiba palabra Francis Saladin Jr. kende hunto cu e actual presidente, Frans Ponson, ademas di Randall Croes, ta forma e directiva actual. Mientras cu Saladin a papia di e motibonan pakico CUA a nace, Ponson a elabora riba e aplicacion mobil cu tur presente por a download na e momento ey y con e organisacion ta bay haci uzo di dje pa mantene un contacto y comunicacion estrecho cu nan miembronan.
Un di e propositonan di e app ta pa dialoga riba topiconan di interes actual y yena posicion di CUA den diferente aspecto di un manera democratico y sin ‘red tape’. Di su parti, Randall Croes a trece dilanti algun di e temanan importante y pendiente pa trata manera Landspakket, reforma fiscal y leynan laboral, entre otro.
Como prome orador na un evento di CUA, a invita Shensley Tromp, gerente di desaroyo y IT pa aeropuerto na Aruba Airport Authority N.V. El a haci un presentacion concentra di loke ta e prome fase di e proyecto Gateway 2030 y kico por spera di e cambionan positivo den experiencia pa usuarionan.
Otro punto resaltante di su presentacion y di e anochi riba su mes ta e anuncio cu AAA N.V. hunto cu otro aeropuertonan di Caribe Hulandes a cera un aliansa y ta trahando riba un proyecto di aviacion electrico cu lo por revoluciona e trafico aereo regional cu pasashi entre islanan ABC y St. Maarten pa prijsnan hopi economico. Esaki na su luga, por fomenta mas relacion comercial entre e diferente islanan.
Sigur un anochi masha agradabel caminda representantenan di companianan chikito, mediano y grandi por a disfruta di un ocasion agradabel despues di hopi tempo y acontecimentonan tras di lomba, pero tambe pa pensa hunto riba e posibilidadnan cu futuro ta trece dilanti.
