Parlamentario, drs. Mervin Wyatt-Ras a trece padilanti cu porfin e prome grupo di mucha muhe a cuminsa participa den e proyecto di formacion social. Esaki ta un proyecto ya existente pa mas o menos 10 aña. Esaki ta un proyecto cu a inicia cu mucha homber so como grupo.
E proyecto aki ta basa ariba e ley di sociale vorming, presenta pa
e Minister Presidente di e tempo ey, Mike Eman di Gabinete Eman I y tur miembro di Parlamento a aproba e ley aki unanimamente.
Na aña 2011 ya caba den un reunion publico, durante cual a presenta e pensamento pa e proyecto aki, parlamentario Mervin Wyatt-Ras a presenta un mocion pa inclui mucha muhe den e grupo pa sigui formacion social. Motivacion pa e mocion tabata entre otro cu den estadistica di aña 2010 por a nota cu e cantidad di mucha muhe ta casi igual cu e cantidad di mucha homber cu tin dificultad y cu no ta caba scol.
Tambe ta necesario pa duna e mucha muhenan mesun oportunidad cu mucha homber pa haya un formacion adecuado. Demas colega den Parlamento a firma e mocion y a aproba esaki unanimamente den un reunion publico.
Ora cu a pasa e ley, den prome instancia, a bira posibel cu hoben masculino di 18-24 aña, cu no a caba scol of cu no tin suficiente perspectiva por a haya un segundo oportunidad pa sigui un opleiding of un estudio y formacion den cierto curriculum/area y tambe ricibi formacion pa desaroyo di habilidad practico y social. E hoben por a haya un educacion y sosten pa asina e por bay dilanti den bida.
Tin diferente factor cu ta haci cu un hoben no ta caba scol. Tin entre otro e factornan academico, psychosocial y familiar cu ta haci cu e hoben ta “ontspoor” y no ta caba scol. Banda di esey tin e aspecto di motivacion cu ta un fenomeno di e tempo di pubertad. Durante pubertad, e hobennan ta bezig cu nan mes y cu nan ‘peers’. Ademas nan in dificultad pa focus, locual por conduci cu nan ta “drop out”.
Durante tur e a añanan, parlamentario Wyat-Ras a keda boga pa e mocion di inclusion di mucha muhe den e proyecto y tabatin como contesta cu ta buscando e forma y mester di e person- of profesionalnan cu por atende cu e mucha muhenan den e proyecto, cual ta encera training militar tambe.
Wyatt-Ras ta satisfecho cu su vision como tambe di su partido a realisa despues di 10 aña. Tabatin hasta un tempo despues cu gobierno a sinta na aña 2017 cu no kier a prolonga e proyecto y no tabata paga e coordinado di e proyecto. Sinembargo pueblo a keda pidi pa e proyecto aki como yudansa pa nos hobennan y mustra riba e necesidad di esaki. Pa e motibo ey, gobierno a sigui cu ne. Wyatt-Ras ta felicita e persona cu semper a maneha e proyecto, juffrouw Jessy Ras, pa esaki y tambe tur esunnan cu ta rond di dje cu a traha pa haci e proyecto posibel, incluyendo Kazerne Militar, pa a realisa cu e ta algo necesario pa nos hubentud. Wyatt-Ras ta spera cu e diescinco mucha muhenan cu a cuminsa cu e proyecto y e diescinco mucha hombernan tambe, pues trinta hoben por sigui e trayecto te na su final y cu nan por bin den contacto tambe cu dunado di trabou pa asina nan por ubica riba e mercado laboral pa den futuro nan yega na un trabou. Ta di elogia cu porfin mucha muhenan cu no a caba scol por haya oportunidad igual cu mucha pa desaroya nan mes.
