E asunto di e proyecto hotelero na Colony tin tur hende den un incertidumbre, kende ta e compania of companianan cu ta na encargo di dje.
Segun informacionnan cu nos a ricibi, e compania cu a haya e opcion aki y cu ta considera e long lease, ta Three Rivers Real Estate NV, cu ta wordo posei un 60% pa un compania cu ta 100% posei a e grupo Martinon (Grumasa), grupo Spaño cu basta experiencia y lider riba e mercado hotelero den Caribe y islanan Canarias, cu mas di 7000 cama.
E otro 70% ta di Connected Capital, entidad financiero basa na London, totalmente regula pa FCA, organo cu ta regula y ta supervisa tur e institucionnan financiero na Inglatera.
Aparentemente Grupo Martinon – Grumasa, siendo socio mayoritario di e proyecto y pa su experiencia den e sector, ta responsabel di diseña, dirigi y administra e hotel.
Dreams Resorts & Spa
Grupo Martinon ta un di e doñonan di AMResorts, cu ta un coleccion di hotel All Inclusive cu segun nan ta indica riba nan website, riba un nivel nobo di luho, cu privilegionan sin fin, sin limite y diversion sin limite y tin bao di su encargo hotelnan manera Zoetry y Dreams Resorts & Spa.
Dreams Resorts & Spa ta un di e hotelnan aki, cu ta ofrece luho na pareha y pareha cu yiu, den un setting na beach. Camber y suitesnan espacioso ekipa pa provee e experiencia di vacacion perfecto cu inclusionnan romantico y servicio di primera.
Dreams Resorts & Spa tin varios hotel tanto na Costa Rica, Republica Dominicana, Mexico y na Panama.
